کویت اردو نیوز 20فروری: رواں سال رمضان المبارک میں عمرہ زائرین کیلئے حرمین شریفین انتظامیہ کی جانب سے تیاریاں شروع کر دی گئ ہیں۔ انتظامیہ کا کہنا ہے کہ اس سال رمضان المبارک میں زائرین کو گزشتہ برس کے مقابلے میں زیادہ سہولیات فراہم کی جائیں گی۔
حرم شریف کی انتظامیہ نے رمضان کی تیاری کے لیے خصوصی اجلاس میں زائرین کے آمد کو آسان بنانے کے لیے مختلف پہلوؤں کا جائزہ لیا ہے۔ آپریشنل پلان میں زائرین کی ضروریات اور متعلقہ اداروں کی جانب سے پیش کی جانے والی تمام خدمات کی نگرانی پر توجہ مرکوز کی گئی۔اور زائرین کو پیش آنے والی مشکلات کا جائزہ لیا گیا۔
انتظامیہ کے سربراہ اعلیٰ شیخ ڈاکٹر عبدالرحمن السدیس نے کہا کہ اس سال رمضان میں گزشتہ برس کے مقابلے میں زیادہ سہولتیں فراہم کی جائیں گی۔ مسجد الحرام اور مسجد نبوی دونوں مقدس مساجد میں زائرین کو معیاری خدمات فراہم کی جائیں گی۔
اجلاس میں ماہرین نے تجویز دی کہ رمضان کے دوران طلبہ کی سکولوں میں حاضری کے بجائے تعلیم آن لائن کی جائے تاکہ ٹریفک کا رش نہ ہو، اور اس سلسلے میں انتظامیہ نے رمضان کے حوالے سے ابلاغی پروگرام بھی ترتیب دیا ہے۔ مزید یہ کہ زائرین کو معتبر اور مستند آگہی سادہ انداز میں فراہم کی جائے گی۔
انتظامیہ کا کہنا ہے کہ’ اس سال مسجد الحرام میں رمضان کے دوران افطار دسترخوانوں کی نمبرنگ ہوگی۔ تا کہ زائرین کو کسی بھی قسم کی مشکل نہ ہو۔
دوسری جانب سعودی عرب نے نئے حج موسم کے لیے پیشگی انتظامات شروع کر دیے ہیں اور اس سلسلے میں وزارت صحت و عمرہ کے ساتھ مشترکہ تعاون کی یادداشت پر دستخط کیے گئے ہیں۔
مکہ میونسپلٹی نے کیٹرنگ کمپنیوں کے مالکان اور اداروں سے کہا ہے کہ نئے حج سیزن میں خوراک پروگرام میں حصہ لینے کے خواہشمند اپنا ڈیٹا اپ ڈیٹ کریں جب کہ وزارت حج و عمرہ نے گھروں کے مالکان سے کہا کہ’ وہ عازمین کو اپنے یہاں ٹھہرانے کے لیے اجازت نامہ حاصل کرلیں‘۔
واضح رہے کہ وزیر حج و عمرہ ڈاکٹر توفیق الربیعہ نے اعلان کیا تھا کہ اس سال 20 لاکھ افراد کو حج خدمات فراہم کی جائیں گی۔
