کویت اردو نیوز 13 مارچ: سعودی عرب کے معروف خطاط صالح المنصوف 86 سال کی عمر میں انتقال کر گئے ہیں۔ انہیں 50 سال قبل سعودی عرب کے پرچم پرکلمہ طیّبہ لکھنے اور تلوارکے انداز کواپ ڈیٹ کرنے کا اعزازحاصل تھا۔
اتفاق سے ان کی وفات بھی سعودی عرب کے قومی پرچم کے دن 11 مارچ کو ہی ہوئی ہے۔ صالح المنصوف پہلے سعودی خطاط تھے جنہوں نے 1960 کی دہائی کے اوائل میں سعودی عرب کے پرچم پرسفید رنگ کا استعمال کرتے ہوئے تلوار بنائی تھی۔
انہوں نے ہی سبزرنگ کے پرچم پر اس تلوارکے اوپرسفید رنگ میں کلمہ طیّبہ رقم کیا تھا۔ اس وقت ٹیکنالوجی اور پرنٹنگ کے آلات عام دستیاب نہیں تھے۔ وہ ان پہلے خطاطوں میں بھی شامل تھے جن کی کتابت جامعہ امام محمد بن سعود کے لاتعدادگرایجویٹس کی اسناد اور سرٹیفکیٹ کی زینت بنی تھی اور وہ ایک عرصہ یہ تعلیمی اسناد تحریر کرتے رہے تھے۔
مرحوم المنصوف کو بلدیہ الریاض نے سرکاری تقریبات اورپروگراموں میں استعمال کے لیے خطاطی پینل کی تیاری پر بھی مامورکر رکھا تھا۔
واضح رہے کہ اس ماہ کے اوائل میں سعودی عرب نے 11 مارچ 1937 کی یاد میں سالانہ ‘قومی پرچم کا دن’ منانے کا اعلان کیا تھا۔ جدید سعودی عرب کے بانی شاہ عبدالعزیزآل سعود نے 11 مارچ 1937 کو مملکت کی نمائندگی کے طور پرموجودہ پرچم کی منظوری دی تھی۔ اس دن کو منانے کا فیصلہ شاہ سلمان بن عبدالعزیز کی جانب سے جاری کردہ شاہی حکم نامے کے تحت کیا گیا تھا۔
