کویت اردو نیوز 11 ستمبر: وزیراعلیٰ پنجاب عثمان بزدار کا کہنا ہے کہ لنک روڈ پر خاتون سے زیادتی کا کیس جلد حل ہوگا، متاثرہ خاندان کو یقین دلاتا ہوں انصاف کے تقاضے پورے ہوں گے۔
تفصیلات کے مطابق اپنے تازہ ترین بیان میں عثمان بزدار کا کہنا تھا کہ پنجاب حکومت متاثرہ خاتون اور ان کے خاندان کے ساتھ کھڑے ہیں اور تمام ترہمدردیاں متاثرہ خاندان کے ساتھ ہیں۔
انہوں نے کہا کہ گھناؤنے واقعے میں ملوث ملزمان رعایت کے مستحق نہیں، متاثرہ خاندان کو یقین دلاتا ہوں انصاف کے تقاضے پورے ہوں گے، متاثرہ خاتون کو انصاف کی فراہمی کے لیے آخری حد تک جائیں گے۔
وزیراعلیٰ کا مزید کہنا تھا کہ پنجاب پولیس پہلے بھی افسوسناک واقعات کے ملزمان کو گرفت میں لاچکی ہے، اصل ملزمان کی گرفتاری کے لیے چھاپے مارے جارہے ہیں، جگہ گرفتار افراد سے بھی تفتیش جاری ہے۔
یہ خبر بھی پڑھیں: پاکستانی ویزہ پر پابندی پر بات چیت
خیال رہے کہ گزشتہ روز آئی جی پنجاب کا کہنا تھا کہ پولیس نے تحقیقات کر کے ملزمان کے گاؤں کا سراغ لگا لیا۔ انہوں نے بتایا کہ مسلح افراد نے ڈنڈوں سے خاتون کو تشدد کا نشانہ بنایا اور پھر شیشہ توڑ کر انہیں زیادتی کا نشانہ بنایا جس کی میڈیکل رپورٹ میں بھی تصدیق ہوگئی ہے۔ دوسری جانب سی سی پی او لاہور نے دعویٰ کیا ہے کہ ہم ملزمان کے قریب پہنچ گئے اور انہیں 48 گھنٹوں میں گرفتار کرلیں گے۔
یاد رہے کہ گزشتہ روز لاہور گجرپورہ میں موٹروے پر خاتون کی گاڑی میں پیٹرول ختم ہوا تو مسلح ملزمان آن پہنچے اور انہوں نے خاتون کو بچوں کے سامنے اجتماعی زیادتی کا نشانہ بنایا تھا۔
