کویت اردو نیوز ،28 ستمبر 2023 : بھارت میں نواسے نواسیوں اور پوتے پوتیوں کے ہاتھوں پیسوں میں ڈنڈی مارنے کی وجہ سے پریشان 92 سالہ دادی نے گنتی اور حساب کتاب سیکھنے کیلیے پرائمری اسکول میں داخلہ لے لیا۔
بھارتی میڈیا کے مطابق ریاست اترپردیش کے علاقے ’’بلند شہر‘‘ میں 92 برس کی دادی اماں نے اسکول میں داخلہ لے لیا ہے ، 1930ء میں پیدا ہونے والی معمر خاتون جن کا نام سلیمہ خان ہے کبھی اسکول نہیں گئی تھیں۔
معمر خاتون کی شادی 14 سال کی عمر میں ہوگئی تھی ، خود ان پڑھ ہونے کے باوجود انہوں نے اپنے اولاد کو علم کے زیور سے آراستہ کیا۔
سلیمہ خان اپنےنواسے نواسیوں اور پوتے پوتیوں سے کوئی چیز منگوائیں تو شرارتی بچے بوڑھی اماں کے بقایا پیسوں میں ڈنڈی مار جاتے ہیں کیوں کہ ان کی دادی اماں گنتی کرنے اور حساب کتاب میں نہیں جانتیں۔
جلد ہی دادی اماں اپنی اولادوں کی اولادوں کی کارستانی کو بھانپ گئیں اور جب ان کے سب سے چھوٹے پوتے نے اسکول میں داخلہ لیا تو انہوں نے خود بھی اسکول جانے کا فیصلہ کرلیا۔
جب 92 سالہ دادی کی ضد کے آگے گھر والوں نےہتھیار ڈال دئیے ہیں تو دادی پوتا ایک ساتھ اسکول جانے لگے ہیں۔