کویت اردو نیوز : آئی سی سی ورلڈ کپ 2023 کے فائنل سے قبل آسٹریلوی کپتان پیٹ کمنز نے پچ پر اعتراضات اٹھادئیے ہیں ۔
بھارتی میڈیا رپورٹس کے مطابق وہ گزشتہ روز نریندر مودی اسٹیڈیم میں بھارت اور آسٹریلیا کے درمیان ورلڈ کپ فائنل سے قبل پچ کی حالت دیکھ کر غصے میں آگئے۔
پچ کے معائنے کے دوران آسٹریلوی کپتان پیٹ کمنز نے گراؤنڈ اسٹاف کےساتھ بار بار تکرار کی کیوں کہ انہوں نے پچ کے کچھ مخصوص حصوں کی نشاندہی کی۔
میڈیا رپورٹس میں دعویٰ کیا جا رہا ہے کہ پیٹ کمنز نے ٹریننگ سیشن کے دوران پچ کا معائنہ کرنے کے بعد تصاویر لی تھیں۔
رپورٹس بتا رہی ہیں کہ پچ مبینہ طور پر کھردری اور کچی ہے جس میں کریز کے سامنے بڑے پیچ نظر آتے ہیں اور درمیانی حصہ کنکریٹ جیسا ہے۔
اس سے قبل آئی سی سی ورلڈ کپ کے پہلے سیمی فائنل سے قبل بھارتی کرکٹ بورڈ (بی سی سی آئی) نے انٹرنیشنل کرکٹ کونسل (آئی سی سی) کی اجازت کے بغیر پچ تبدیل کر دی تھی۔
سیمی فائنل کے لیے مختص پچ استعمال نہیں کی گئی لیکن یہ میچ پچ نمبر 6 پر کھیلا جا رہا ہے جس پر پہلے ہی 2 میچز کھیلے جا چکے ہیں اور یہ پچ بھارت کے لیے مددگار ثابت ہوئی ہے ۔
واضح رہے کہ جب پچ کی تبدیلی کا تنازع سامنے آیا تو سابق کپتان سنیل گواسکر نے پچ کی تبدیلی کی نشاندہی کرنے والوں کو ہی احمق قراردے دیا تھا ۔