کویت اردو نیوز : امام کعبہ ڈاکٹر صالح بن عبداللہ بن حمید سعودی وفد کے ہمراہ 6 روزہ دورے پر پاکستان پہنچ گئے۔ نگران وفاقی وزیر داخلہ سرفراز احمد بگٹی، وفاقی وزیر تعلیم مدد علی سندھی، معاون خصوصی علامہ طاہر اشرفی اور سعودی سفیر نواف بن سعید المالکی نے ایئرپورٹ پر امام کعبہ کا استقبال کیا۔ اپنے دورے کے دوران امام کعبہ پاکستان میں اعلیٰ قیادت سے ملاقاتیں کریں گے۔ وفد میں سعودی وزیر داخلہ، وزیر تعلیم بھی شامل ہیں۔ بعد ازاں امام کعبہ نے وزیر تعلیم مدد علی سندھی سے ملاقات کی۔ سعودی عرب کے سفیر نواف سعید المالکی اور بین الاقوامی اسلامی یونیورسٹی کے صدر بھی اس موقع پر موجود تھے۔
امام کعبہ پروفیسر ڈاکٹر صالح بن عبداللہ بن محمد الحمید نے کہا ہے کہ پاکستان اپنے گھر جیسا محسوس ہوتا ہے، پاکستان سعودی تعلقات گہرے اور تاریخی ہیں، نفرتوں کو ختم کرنے کا بہترین ذریعہ تعلیم ہے، بین الاقوامی اسلامی یونیورسٹی دینی تعلیم کو فروغ دے رہی ہے اور اسلامی تعلیمات کو فروغ دے رہی ہے۔ امام تعلیمات کے فروغ میں مثالی کردار ادا کر رہے ہیں ، امام کعبہ نے کہا کہ مجھے پاکستانیوں سے مل کر ہمیشہ خوشی ہوتی ہے۔ انہوں نے کہا کہ دونوں ممالک کے عوام ایک دوسرے سے بے پناہ محبت رکھتے ہیں۔
امام کعبہ نے کہا کہ وزارت تعلیم اور اسلامی یونیورسٹی کے درمیان جاری تعاون سے پوری دنیا کے طلباء مستفید ہوں گے۔ انہوں نے کہا کہ وہ اسلامی یونیورسٹی کو سراہتے ہیں کہ یونیورسٹی نے شریعت اور قانون کی روشنی میں انسانی زندگی کی اہمیت کے موضوع پر کانفرنس کا انعقاد کیا جس میں وہ خصوصی طور پر شرکت کے لیے تشریف لائے۔ امام کعبہ کا یونیورسٹی آنے پر شکریہ ادا کیا گیا ۔
انہوں نے کہا کہ یونیورسٹی دینی و عصری علوم کے فروغ کے لیے اہم کردار ادا کر رہی ہے اور وزارت تعلیم یونیورسٹی کے ساتھ تعاون جاری رکھے گی۔ انہوں نے کہا کہ ہم مدارس اور یونیورسٹیوں کے ذریعے محبت کے پیغام کو عام کرنے کی کوشش کر رہے ہیں۔
