کویت اردو نیوز : پاکستان میں حج 2024 ء کے لیے درخواستوں کی وصولی آج سے شروع ہو رہی ہے۔
وزارت مذہبی امور کے ترجمان نے پیر کو ایک بیان میں کہا کہ سرکاری حج سکیم کے تحت 15 نامزد بینکوں میں حج درخواستوں کی وصولی کا سلسلہ 12 دسمبر تک جاری رہے گا۔
وزارت مذہبی امور کے اعلان کے مطابق آئندہ سال تقریباً 89 ہزار 605 پاکستانی سرکاری سکیم کے تحت فریضہ حج ادا کریں گے۔
بیان کے مطابق مقررہ تعداد سے زیادہ درخواستیں موصول ہونے پر قرعہ اندازی کی جائے گی جب کہ خواتین پہلی بار محرم کے بغیر حج کر سکیں گی۔
واضح رہے کہ پاکستانی پاسپورٹ پر 16 دسمبر 2024 تک درخواستیں جمع کرائی جا سکتی ہیں۔
پاسپورٹ درخواست ٹوکن پر بھی حج کی درخواست پر کارروائی کی جا سکتی ہے۔ اسپانسر شپ سکیم کے تحت 25000 نشستیں پہلے آئیے پہلے پائیے کی بنیاد پر مختص کی جائیں گی جبکہ باقاعدہ حج سکیم کے تحت موصول ہونے والی درخواستوں کی قرعہ اندازی کی جائے گی۔
اس سے قبل نگراں وفاقی وزیر برائے مذہبی امور امورانیق احمد نے حج پالیسی 2024 کا اعلان کرتے ہوئے اخراجات میں ایک لاکھ روپے کی کمی کا اعلان کیا تھا۔کراچی کو روڈ ٹو مکہ میں شامل کیا گیا ہے جبکہ لاہور کے لیے کوششیں جاری ہیں۔
اسلام آباد میں پریس کانفرنس کرتے ہوئے نگراں وفاقی وزیر مذہبی امور انیق احمد کا کہنا تھا کہ انہوں نے حج پالیسی 2024 پر 3 ماہ کام کیا، حاجیوں کی دعائیں وصول کرنا چاہتے تھے۔
انیق احمد نے کہا کہ ایک لاکھ روپے کی کمی کے بعد حج پیکج کو 10 لاکھ 75 ہزار روپے تک لایا گیا ہے۔
انہوں نے کہا کہ نگران وزیراعظم انوار الحق کاکڑ نے حج پالیسی بنانے میں ہر قدم پر رہنمائی کی جب کہ سعودی حکومت نے بھی ہمارا بھرپور ساتھ دیا۔
