کویت اردو نیوز : ویسے گھر میں چوہے گھس جائیں تو بہت تباہی مچاتے ہیں۔ لیکن ویلز میں ایسا انوکھا چوہا نمودار ہوا ہے جو انسان کے بکھرے ہوئے سامان کو سمیٹ کر ایک جگہ رکھنے کا کام کرتا ہے۔
ہاں واقعی یہ چوہا تقریباً 2 ماہ سے ہر رات بکھرا سامان سمیٹ رہا ہے۔
یہ واقع وائلڈ لائف فوٹوگرافر روڈنی ہالبروک کے ساتھ ہوا۔
ایک دن، انہیں معلوم ہوا کہ ان کا سامان، جسے وہ میز پر بکھرا چھوڑا کرتے تھے، راتوں رات پراسرار طریقے سے اپنی جگہ پر لوٹ آتاہے۔
پاویس، ویلز سے تعلق رکھنے والے روڈنی ہالبروک نے اس راز کو جاننے کے لیے اپنے کام کی جگہ پر نائٹ ویژن کیمرہ نصب کیا۔ اس کیمرے کی ریکارڈنگ نے فوٹوگرافر کو دنگ کر دیا۔
75 سالہ روڈنی ہالبروک نے ایک انٹرویو میں کہا کہ "یہ کئی ہفتوں سے جاری ہے اور میں اسے ویلز کا صفائی والا چوہا کہتا ہوں”۔
انہوں نے مزید کہا کہ "پہلے میں نے محسوس کیا کہ میں اپنے پرندوں کے لیے جو کھانا چھوڑتا ہوں وہ پرانے جوتوں میں پہنچ جاتا ہے جو میری میز کے نیچے محفوظ ہوتے ہیں، اس لیے میں نے حقیقت جاننے کے لیے وہاں ایک کیمرہ لگایا،”
کیمرے کی فوٹیج میں دکھایا گیا ہے کہ ایک چوہا میز پر موجود اشیاء کو اکٹھا کر کے ایک ٹرے میں رکھتا ہے۔
اس دریافت کے بعد فوٹوگرافر نے مزید تجربات کیے، مختلف اشیاء کو وہیں چھوڑ کر یہ دیکھا کہ چوہا کیا کرے گا۔
چوہے نے یہ اشیاء بھی اکٹھی کیں اور تاروں کو باندھنے کے لیے استعمال ہونے والی ٹائی بھی ٹرے میں رکھ دی۔
روڈنی ہالبروک نے کہا، ‘جب میں نے چوہے کو سامان سمیٹتے ہوئے دیکھا تو مجھے یقین نہیں آیا۔’
"اس نے ہر طرح کی چیزیں ٹرے میں رکھ دیں۔ اس دریافت کے بعد، میں اب میز پر چیزیں اٹھانے کے بارے میں نہیں سوچتا کیونکہ میں جانتذ ہوں کہ وہ اسے ٹھیک کر دے گا۔” میں اپنا سامان ٹرے کے باہر چھوڑتا ہوں اور وہ اسے دوبارہ اپنی جگہ پر رکھتا ہے، 100 میں سے 99 بار چوہا رات کو ایسا کرتا ہے۔
چوہے کی یہ ویڈیو اب وائرل ہوگئی ہے۔
اس سے قبل 2019 میں، برطانیہ کے شہر برسٹل سے تعلق رکھنے والے سٹیو میک کارس کی ایک ویڈیو وائرل ہوئی تھی، جس میں احاطے میں ایک چوہے کو ‘ذخیرہ اندوزی’ کرتے ہوئے دکھایا گیا تھا۔