کویت اردو نیوز 12 نومبر: سالہا سال سے پاکستانی خواتین کی نمائندہ تنظیم پاکستان ویمن فورم، کویت میں ایک فعال اور متحرک کام کر رہی ہے۔ مسز یاسمین مظفر، جنہوں نے اس تنظیم کی بنیاد رکھی، نے رات دن اسکو فعال بنانے میں جدوجہد کی۔ تب سے لے کر محترمہ نادیہ محمد تک ہر خاتون نے اس میں اپنے حصے کی وہ شمع روشن کی جو ہمیشہ روشنی بکھیرتی رہیں گی۔
یہ تنظیم بلاشبہ پاکستانی خواتین کا جہاں فخر و ناز ہے، وہاں ایک ایسا موقع فراہم کرنے کا پلیٹ فارم ہے جس میں انکو اپنے انتظامی ہنر اور تعلیم کے جوہر دکھانے کے مواقع ملتے ہیں۔
گزشتہ اتوار 8 نومبر کو حسب روایت اسی ڈسپلن اور مہارت کا مظاہرہ دیکھنے میں آیا جب مسز رومینہ سرور جو کہ 2006 سے اس تنظیم سے منسلک ہیں اور دو مرتبہ نائب صدر کے عہدے پر فائز رہ چکی ہیں، انہوں نے پہلی مرتبہ آن لائن انتخابات سے سب کو روشناس کروا کر قیادتِ نو تشکیل دی۔
جہاں پاکستانی سفارت خانہ نے انتظامی رہنمائی و مدد کی، وہاں اس پوری کاروائی کے دوران عزت مآب سفیر پاکستان سید سجاد حیدر کی اہلیہ مسز عنبرین مصطفیٰ (سربراہ تنظیم) کی سرپرستی و شفقت بھی حاصل رہی۔ مسز صبیحہ عبید نے دورانِ انتخابات منصف کا اعلیٰ کردار ادا کیا اور اپنی صداقت اور ایمانداری سے شفاف انتخابات کو یقینی بنایا۔ نو منتخب قیادت نے خواتین کے اظہار اعتماد کا شکریہ ادا کیا اور اس عزم کا ارادہ کیا کہ محنت اور لگن سے اس تنظیم کے کام کو مزید نکھاریں گے۔
انتخاب کے ذریعے محترمہ حنا سلیم اگلے دو سال کیلئے پاکستان ویمن فورم کویت کی صدر منتخب ہوگئیں، وہ درس و تدریس کے شعبے سے تعلق رکھتی ہیں اور کویت بھر میں انہیں بڑے احترام کی نظر سے دیکھا جاتا ہے۔ انھوں نے گزشتہ انتظامیہ کے کام کی بے حد تعریف کی اور اس عہد کا اعادہ کیا کہ ہم سب مل کر گزشتہ روایات کو برقرار رکھتے ہوئے خواتین میں بنیادی شعور کی آگاہی اور کویت پاکستان فرینڈشپ میں اپنا بھرپور کردار ادا کرتی رہیں گی۔ نائب صدر کے لیے محترمہ نگہت طارق جبکہ محترمہ مروہ فیاض جنرل سیکرٹری اور محترمہ رابعہ برنی سیکرٹری خزانہ کے لیے منتخب ہوئیں جبکہ مسز رومینہ اور مسز نادیہ ایگزیکٹو ممبر پر منتخب ہوئیں۔ ریڈیو کویت اردو سروس کی اینکر مسز نِدا مرزا کو میڈیا ہیڈ کی ذمہ داری تفویض کی گئی۔
نومنتخب صدر نے تمام کمیونٹی اور خصوصی طور پر بیگم سفیر پاکستان محترمہ عنبرین مصطفیٰ اور محترمہ تحریم الیاس جنہوں نے اس تقریب میں بطور مہمانِ خصوصی شرکت فرمائی، اُن کا بے حد شکریہ ادا کیا اور مزید تعاون و رہنمائی کی استدعا کی۔