کویت اردو نیوز : سعودی ریلوے نے ریلوے سروس کا نیا منصوبہ شروع کر دیا ہے۔ ‘ڈریم آف دی ڈیزرٹ’ کے نام سے شروع کی جانے والی ریل سروس دارالحکومت ریاض سے القریات تک چلائی جائے گی۔
سعودی ریلوے اگلے سال کی چوتھی سہ ماہی میں ٹرین کا افتتاح کرے گا۔
سعودی خبر رساں ایجنسی "ایس پی اے” کے مطابق جمعرات کو سعودی عرب اور اٹلی کے درمیان ” صرائی ڈریم” ٹرین کا معاہدہ طے پا گیا۔
سعودی عرب کی جانب سے سعودی ریلوے ایس اے آر کے ایگزیکٹو چیئرمین ڈاکٹر بشار الملک اور اطالوی آرسینالی گروپ کے چیئرمین پاولو پارلینا نے معاہدے پر دستخط کیے۔
اس موقع پر سعودی وزیر مواصلات اور سعودی ریلوے کمپنی کی مجلس انتظامیہ کے چیئرمین انجینئر صالح الجاسر بھی موجود تھے۔
الجاسر نے کہا کہ سعودی عرب میں لگژری سہولیات سے آراستہ ٹرین سروس پہلی بار مشرق وسطیٰ اور شمالی افریقہ میں پیش کی جا رہی ہے جس کی بدولت مسافروں کو مملکت میں معیاری ٹرانسپورٹ کے حوالے سے نئے تجربات حاصل ہوں گے۔
ڈاکٹر الملک نے کہا کہ ‘ڈریم آف دی ڈیزرٹ’ سار کمپنی کی کامیابیوں میں ایک نیا اضافہ ہوگا۔
اس کی بدولت سعودی عرب کے مکینوں اور یہاں سیاحت کے لیے آنے والوں کو مملکت کے مزید علاقوں کی سیر کے مواقع میسر آئیں گے۔
اطالوی گروپ کے سربراہ کا کہنا تھا کہ اٹلی میں ‘ڈیزرٹ ڈریم’ کی تیاریاں شروع کر دی گئی ہیں تاکہ سروس کو طے شدہ شیڈول کے مطابق وقت پر شروع کیا جا سکے۔
ٹرین 40 لگژری کوچز پر مشتمل ہوگی۔ بکنگ اس سال کے آخر میں شروع کر دی جائے گی۔
یاد رہے کہ اٹلی کی السینال کمپنی نے ‘ڈریم آف دی ڈیزرٹ’ پر 200 ملین ریال سے زائد کی سرمایہ کاری کی ہے۔