کویت اردو نیوز : سعودی عرب میں حرمین شریفین کے امور کی جنرل اتھارٹی نے مسجد الحرام میں رمضان پلان پر عمل درآمد کے بعد اس حوالے سے تفصیلات جاری کیں۔
سرکاری خبر رساں ایجنسی "ایس پی اے” کے مطابق اتھارٹی کے سرکاری ترجمان انجینئر مہر بن منسی الزہرانی نے کہا ہےکہ زائرین کی نقل و حرکت کو محفوظ اور منظم بنانے کے لیے داخلی اور خارجی راستوں پر مختلف رنگوں کے 1000 مضبوط پلاسٹک پینلز لگائے گئے ہیں۔
ترجمان نے کہا ہے کہ رمضان المبارک 1445 ہجری کے پلان کے فریم ورک کے اندر اس بات کو یقینی بنانے پر خصوصی توجہ دی جا رہی ہے کہ ارد گرد کا ماحول صحت مند اور محفوظ رہے۔ اس سلسلے میں صفائی کرنے والوں اور سپروائزرز کو خصوصی تربیت فراہم کی گئی ہے۔
اتھارٹی کے سرکاری ترجمان نے کہا کہ زائرین کو رمضان المبارک کے دوران مسجد الحرام کی لائبریری اور نمائش دیکھنے اور کسوہ کمپلیکس کا دورہ کرنے کا موقع دیا جاتا ہے۔ زائرین رمضان کے مہینے میں کسوہ کمپلیکس کا دورہ کر سکتے ہیں۔ جس کے لیے مختلف اوقات مقرر کیے گئے ہیں۔
الزہرانی نے وضاحت کی کہ مسجد الحرام نے ایسے ملازمین کو بھی تربیت دی ہے جو روشنی اور ساؤنڈ سسٹم کی نگرانی کرتے ہیں تاکہ روشنی کے بہتر انتظام کو برقرار رکھا جاسکے۔ اس کے علاوہ ایئر کنڈیشننگ سسٹم کی نگرانی کے لیے ماہر اہلکار تعینات ہیں۔
جبکہ شاہ فہد گیٹ کی دوسری منزل پر واقع ہولی مسجد لائبریری دن کے کسی بھی وقت دیکھی جا سکتی ہے۔