کویت اردو نیوز : محکمہ موسمیات پاکستان نے شوال کا چاند 9 اپریل کو نظر آنے کا امکان ظاہر کیا ہے۔
محکمہ موسمیات نے عیدالفطر کے چاند کی پیش گوئی کرتے ہوئے کہا ہے کہ نئے چاند کی پیدائش 8 اپریل کو رات 11 بجکر 21 منٹ پر ہوگی اور 9 اپریل کو چاند نظر آنےکے واضح امکانات ہیں۔
محکمہ موسمیات کے مطابق 9 اپریل کو چاند کی عمر 19 سے 20 گھنٹے ہوگی اور غروب آفتاب کے بعد چاند کی رویت کا دورانیہ 50 منٹ سے زائد ہوگا۔
محکمہ موسمیات کے مطابق 9 اپریل کو ملک کے بیشتر علاقوں میں موسم صاف رہنے کا امکان ہے جب کہ ملک کے شمالی علاقوں میں مطلع ابر آلود ہو سکتا ہے۔
واضح رہے کہ اس سے قبل رویت ہلال کمیٹی پاکستان کے چیئرمین مولانا عبدالخبیر آزاد بھی سائنسی بنیادوں پر رمضان المبارک کا نیا چاند 29 تاریخ کو نظر آنے کا امکان ظاہر کر چکے ہیں۔
رویت ہلال کمیٹی کے چیئرمین مولانا عبدالخبیر آزاد نے کہا کہ پاکستان میں عید الفطر 10 اپریل بروز بدھ کو منائی جا سکتی ہے۔
