کویت اردو نیوز 5 مارچ: تفصیلات کے مطابق صدر آرٹس کونسل محمد احمد شاہ نے تصدیق کی ہے کہ سینئراداکار قوی خان کینیڈا میں انتقال کرگئے۔
انہوں نے بتایا کہ قوی خان طبیعت ناسازی کے باعث کینیڈا میں زیرعلاج تھے جہاں وہ آج خالق حقیقی سے جاملے۔ محمد قوی خان 15 نومبر، 1932 میں پیدا ہوئے۔ انہوں نے فنی زندگی کا آغاز ریڈیو پاکستان سے کیا۔
انیس سو چونسٹھ میں جب لاہور میں پاکستان ٹیلی وژن کا آغاز ہوا تو انہیں اس کے پہلے ڈرامے میں کام کرنے کا اعزاز حاصل ہوا۔ اس کے بعد انہوں نے لاتعداد سیریلز، سیریز اور انفرادی ڈراموں میں کام کیا۔
ان کے مشہور ڈراموں میں اندھیرا اجالا ، فشار، لاہوری گیٹ، دو قدم دور تھے، مٹھی بھر مٹی، من چلے، میرے قاتل مرے دلدار، پھر چاند پہ دستک، در شہوار، بیٹیاں، داستان نام سرفہرست ہیں۔قوی خان پاکستان ٹیلی وژن کی پہلے اداکار تھے جنہیں صدارتی تمغا برائے حسن کارکردگی سے نوازا گیا۔ یہ اعزاز انہیں 14 اگست 1980 کو ملا۔
بعد ازاں انہیں ستارہ امتیاز سے بھی سرفراز کیا گیا، محمد قوی خان پی ٹی وی ایوارڈ اور ریڈیو پاکستان اور پاکستان ٹیلی وژن کے لائف اچیومنٹ ایوارڈ بھی حاصل کرچکے ہیں۔ انہوں نے کئی فلموں میں بھی کام کیا اور تین نگار ایوارڈز بھی حاصل کیے۔
