لاہور: (کویت نیوز اردو) پولیس نے ایک ایسے انوکھے چور کو گرفتار کرلیا ہے ، جس نے آج سے 13 سال قبل موٹر سائیکل چوری ہونیکے بعد اپنا ایک گینگ بنا کر ڈکیتی کی 57 وارداتیں کر کے کئی شہریوں کو لوٹ لیا۔
پنجاب پولیس کے مطابق ملزم مبشر کی موٹر سائیکل 13 سال قبل چوری ہو گئی تھی ، جس کے بعد موٹر سائیکل کا کہیں کوئی سراغ نہ ملا ۔
مبشر نے موٹرسائیکل چوری ہونے کے بعد دل برداشتہ ہو کر خود بھی چور اور ڈکیت بننے کا فیصلہ کرلیا اور اپنے ساتھ فرحان نامی شہری کو ملا کر اپنا گینگ بنا لیا اور لوٹ مار شروع کر دی ۔
حال ہی میں ہونے والی ایک واردات میں ایک کارروائی کے دوران ملزمان کے چہرے واضح تھے ، جس کی وجہ سے پولیس دونوں ملزمان تک پہنچ گئی اور انہیں گرفتار کر کے مقدمہ درج کرلیا۔
ملزم مبشر نے دوران تفتیش اعتراف کیا کہ وہ 13 سال قبل خود لٹ گیا تھا جس لکے بعد اُس نے بھی چور بننے کا فیصلہ کیا اور اپنے دوست کے ساتھ ملکر ستاون (57 ) وارداتیں کیں ۔
پولیس کے مطابق ملزمان کے قبضے سے 2 عدد موٹرسائیکلیں اور ایک پستول برآمد کر لیا گیا ہے ، دونوں ملزمان کیخلاف مقدمہ درج کر کے مزید تفتیش جاری ہے۔
