مسافر کےہاتھوں مسافرقتل ہوگیا

کویت اردو نیوز ، 3 اکتوبر 2023 : پاکستان ایکسپریس میں سیٹ پر جھگڑا ، ایک مسافر نے دوسرے مسافر کوقتل کردیا۔

تفصیلات کے مطابق یہ واقعہ راولپنڈی سے کراچی جانے والی پاکستان ایکسپریس میں پیش آیا جسے ریلوے حکام نے چھپانے کی کوشش کی۔

ٹرین 46DN پاکستان ایکسپریس کا مسافر 50/55 سالہ ثناء اللہ ولد شیر محمد عمر تھا جو اپنی فیملی کے ساتھ علی پور ریلوے اسٹیشن سے فیصل آباد جا رہا تھا۔

ٹرین سانگلہ ہل ریلوے اسٹیشن پر پہنچی تو ایک مسافر ندیم ولد محمد بوٹا اپنے اہل خانہ کے ہمراہ سانگلہ ہل سے حیدرآباد جانے والی ٹرین کی کوچ نمبر 16 اکانومی کلاس میں سوار ہوا۔ دونوں مسافروں میں سیٹ کے لیے تلخ کلامی ہو گئی۔ تشدد کے باعث ثناء اللہ جاں بحق ہو گیا جبکہ ندیم چک جھمرہ سٹیشن پر ٹرین کی رفتار کم ہونے پر ٹرین سے اتر گیا۔ جبکہ لاش فیصل آباد ریلوے سٹیشن پر اتاری گئی۔