کویت اردو نیوز : فوٹو شیئرنگ ایپلی کیشن انسٹاگرام نے اپنے صارفین کے لیے ایک اور نیا فیچر متعارف کرا دیا۔ تازہ ترین اپ ڈیٹ کے بعد صارفین براہ راست ریلز کو ڈاؤن لوڈ کر سکیں گے۔
میٹا کی ذیلی ایپ میں اس نئی اپ ڈیٹ کے بعد، صارفین کو عوامی اکاؤنٹ سے ریلز ڈاؤن لوڈ کرنے کے لیے کسی تھرڈ پارٹی ایپ کی ضرورت نہیں ہوگی۔
اس اپ ڈیٹ سے پہلے، صارفین صرف بعد میں دیکھنے کے لیے ریلز کو ڈیوائس میں محفوظ کر سکتے تھے۔
اپنے نشریاتی چینل پر صارفین کو آگاہ کرتے ہوئے، انسٹاگرام کے سربراہ ایڈم موسیری نے کہا کہ اب دنیا میں کہیں بھی کوئی بھی عوامی ریل براہ راست اپنے آلات پر ڈاؤن لوڈ کر سکتا ہے۔
ایڈم موسیری نے تصدیق کی کہ ہر ڈاؤن لوڈ کی گئی ریل میں ریل کے تخلیق کار کے انسٹاگرام ہینڈل کو نمایاں کیا جائے گا، جیسا کہ ٹک ٹاک میں کرتا ہے۔
واضح رہے کہ چند ماہ قبل کمپنی کی جانب سے یہ فیچر صرف امریکی صارفین کے لیے جاری کیا گیا تھا تاہم اب یہ فیچر عالمی سطح پر متعارف کرایا گیا ہے۔
