کویت اردو نیوز : وزارت حج و عمرہ کا کہنا ہے کہ سردیوں کا آغاز ہوچکا ہے اس لیے عمرہ زائرین اپنی صحت کا خیال رکھیں تاکہ وہ اپنا وقت بہتر طریقے سے عبادت میں گزار سکیں۔
عاجل نیوز نے وزارت حج و عمرہ کی جانب سے عمرہ زائرین کے لیے جاری کردہ احتیاطی تدابیر کا ذکر کیا اور مزید کہا کہ سردیوں میں فلو، کھانسی اور نزلہ زکام عام ہوجاتا ہے۔
مذکورہ موسمی بیماریوں سے محفوظ رہنے کے لیے عمرہ زائرین کو چند احتیاطی تدابیر پر عمل کرنا چاہیے جن میں سب سے اہم ہاتھ اور جسم کی صفائی ہے۔
وزارت حج و عمرہ کی جانب سے جاری کردہ احتیاطی تدابیر میں مزید کہا گیا ہے کہ فلو کی صورت میں فوری طور پر مقررہ طبی مراکز سے رجوع کریں جہاں طبی عملہ ضروری ادویات فراہم کرے گا۔
ہاتھوں کی صفائی پر خاص توجہ دی جائے، خاص طور پر رفع حاجت کے بعد ہاتھ صابن سے اچھی طرح دھوئیں اور کھانا کھانے سے پہلے ہاتھ اچھی طرح دھونے چاہئیں۔
اپنے مدافعتی نظام کو برقرار رکھنے کے لیے متوازن غذا کھائیں۔ پھلوں اور سبزیوں کو کھانے سے پہلے اچھی طرح دھو لیں۔
ایسے لوگوں سے مصافحہ کرنے سے گریز کریں جو سانس کی بیماری میں مبتلا ہوں۔ اگر آپ کو چھینک آتی ہے تو منہ پر رومال یا ٹشو پیپر رکھیں۔
عمرہ کے لیے روانہ ہونے سے پہلے اس بات کو یقینی بنائیں کہ آپ کو فلو سے بچاؤ کے ٹیکے لگائے گئے ہیں۔
