کویت اردو نیوز : برطانیہ کی ایک کمپنی Pavegen نے یہ ٹیکنالوجی تیار کی ہے ، جس کی مدد سے آپ اپنے پیروں سے بجلی پیدا کر سکتے ہیں۔
اس ٹیکنالوجی کا مظاہرہ متحدہ عرب امارات میں ورلڈ فیوچر انرجی کانفرنس میں کیا گیا۔ اس مقصد کے لیے کمپنی نے ٹائلوں میں برقی مقناطیسی جنریٹر کا استعمال کیا ہے، جو پاؤں کی حرکت سے بجلی پیدا کرتا ہے۔
اس موقع پر کمپنی کا کہنا تھا کہ ہر ٹائل کے نیچے ایک الیکٹرومیگنیٹک جنریٹر ہوتا ہے اور جب آپ اس پر قدم رکھتے ہیں تو آپ کے پیروں کی حرکت سے جنریٹر ایکٹیو ہو جاتا ہے۔
انہوں نے کہا کہ اگرچہ ٹائلیں بہت کم توانائی پیدا کرتی ہیں، لیکن وہ اسٹریٹ لائٹس کو روشن کر سکتی ہیں اور چھوٹے آلات کو چارج کر سکتی ہیں۔
کمپنی کے بانی لارنس کیمبل کک کے مطابق ٹائلوں پر چلنے سے پیدا ہونے والی توانائی کو بیٹری یا ڈیوائس میں منتقل کیا جا سکتا ہے۔
Pavegen کی ٹائلیں واشنگٹن میں ایک مقام پر ایل ای ڈی لائٹس کو روشن کرنے کے لیے استعمال کی جا رہی ہیں، جب کہ انھیں برطانیہ میں مختلف مقامات پر پاور مانیٹر اور موبائل فون چارجنگ اسٹیشنوں پر بھی نصب کیا گیا ہے۔
کمپنی سولر پلس کے نام سے ایک ٹائل سسٹم بھی تیار کر رہی ہے جو شمسی توانائی اور قدموں سے پیدا ہونے والی توانائی کا مجموعہ ہو گا۔ انہوں نے بتایا کہ اب تک یہ ٹائلیں 37 سے زائد ممالک میں لگائی جا چکی ہیں جبکہ مختلف گیمز کی تیاری کے لیے اسٹیپس کا ڈیٹا بھی استعمال کیا جا سکتا ہے۔
