کویت اردو نیوز 11 ستمبر: سعودی محکمہ پاسپورٹ نے مملکت میں کام کرنے والے غیر ملکیوں کو اقاموں، وزٹ ویزوں اور خروج و عودۃ (ایگزٹ ری انٹری) ویزوں سے متعلق خوشخبری سنادی۔
سعودی ذرائع ابلاغ کے مطابق خادم حرمین شریفین شاہ سلمان بن عبدالعزیز کی ہدایت پر محکمہ پاسپورٹ نے بیرون مملکت موجود مقیم غیرملکیوں کے اقاموں، وزٹ ویزوں اور خروج و عودۃ (ایگزٹ ری انٹری) ویزوں میں مزید 30 نومبر2021 تک توسیع شروع کردی ہے۔ سرکاری خبر رساں ایجنسی کے مطابق محکمہ پاسپورٹ 25 ربیع الثانی 1443 مطابق 30 نومبر2021 تک ویزوں اور اقاموں میں توسیع کسی فیس یا مقابل مالی کے بغیر خود کار نظام کے تحت کررہا ہے۔ وزیرخزانہ نے کورونا وبا سے مقامی شہریوں اور
سعودی عرب میں مقیم غیرملکیوں کی سلامتی کو یقینی بنانے کی قومی پالیسی کے تحت اقاموں اور ویزوں میں توسیع کے احکامات جاری کیے ہیں۔ سعودی حکومت کی پالیسی یہ ہے کہ مقامی شہریوں اور مقیم غیرملکیوں کو وبا سے جنم لینے والے مالیاتی و اقتصادی مسائل سے ممکنہ حد تک بچایا جائے۔
اسی پالیسی کے تحت اقاموں اور ویزوں میں توسیع کی جارہی ہے۔ ویزوں و اقاموں میں توسیع محکمہ پاسپورٹ کے دفاتر سے رجوع کیے بغیر ہوگی جو کہ خودکار نظام کے تحت ہورہی ہے۔ سعودی محکمہ پاسپورٹ نیشنل انفارمیشن سینٹر کے تعاون سے قانونی طریقہ کار کے مطابق اقاموں، وزٹ ویزوں اور خروج و عودۃ (ایگزٹ ری انٹری) ویزوں کی توسیع کی کارروائی کررہا ہے۔ یاد رہے کہ بیرون ملک مقیم ان ملکوں کے شہریوں کے اقاموں اور خروج و عودہ ویزوں اور وزٹ ویزوں میں توسیع کی جارہی ہے جہاں سے وہ کورونا وباء کے باعث سعودی عرب واپس نہیں آسکتے توسیع 30 نومبر 2021 تک کی جارہی ہے۔
