کویت اردو نیوز 11 ستمبر: متحدہ عرب امارات نے ممنوعہ ممالک کے رہائشیوں کو واپسی کی اجازت دے دی۔
تفصیلات کے مطابق نیشنل اتھارٹی برائے ایمرجنسی ، کرائسز اینڈ ڈیزاسٹر مینجمنٹ اور فیڈرل اتھارٹی برائے شناخت اور شہریت نے اعلان کیا ہے کہ وہ ان ممالک سے رہائشیوں کو واپسی کی اجازت دیں گے جہاں سے پہلے داخلہ ممنوع تھا تاہم واپس آنے والے غیرملکیوں کے پاس متحدہ عرب امارات کا جائز رہائشی اجازت نامہ (اقامہ) ہونے کے ساتھ ساتھ ورلڈ ہیلتھ آرگنائزیشن سے منظور شدہ کوویڈ 19 ویکسین کی مکمل خوراک لگوانے کا ثبوت ہونا لازم ہے۔ جن ممالک کے رہائشیوں کو ملک میں داخلے کی اجازت ہے ان میں
بھارت ، پاکستان ، بنگلہ دیش ، نیپال ، سری لنکا ، ویتنام ، نمیبیا ، زیمبیا ، جمہوریہ کانگو ، یوگینڈا ، سیرالیون ، لائبیریا ، جنوبی افریقہ ، نائیجیریا اور افغانستان کے رہائشی شامل ہیں۔ اس کے لیے تمام آنے والوں پر لازم ہوگا کہ وہ شناخت اور شہریت کے لیے وفاقی اتھارٹی کی ویب سائٹ پر ضروری منظوری حاصل کرنے کے لیے ویکسی نیشن کے ثبوت کے لیے درخواست مکمل کریں کیونکہ
روانگی کے وقت تصدیق شدہ ویکسی نیشن سرٹیفکیٹ کے علاوہ یہ منظوری بھی پیش کرنے کی ضرورت ہوگی۔ انہیں روانگی کی تاریخ سے (48) گھنٹوں کے اندر لیا گیا کوویڈ19 کے منفی پی سی آر ٹیسٹ کا نتیجہ بھی پیش کرنا ہوگا بشرطیکہ ٹیسٹ تسلیم شدہ لیبارٹریوں سے ہوں اور پی سی آر کے علاوہ جہاز میں سوار ہونے سے پہلے کیو آر کوڈ اور ریپڈ پی سی آر ٹیسٹ بھی کروایا گیا ہو۔ متحدہ عرب امارات آمد پر ٹیسٹ چوتھے اور آٹھویں دن ، تمام احتیاطی تدابیر پر عمل کرتے ہوئے پی سی آر ٹیسٹ کروانا ہوگا تاہم 16 سال سے کم عمر کے افراد کو اس سے استثنیٰ حاصل ہوگی۔