کویت اردو نیوز 4مارچ: سعودی عرب میں وزیر اسلامی امور نے رمضان کے استقبال کے لیے تمام مساجد میں ضروری انتظامات کا حکم جاری کیا ہے۔
ساتھ ہی ساتھ مملکت میں وزارت کی تمام شاخوں کے سربراہوں کو تحریری ہدایت جاری کی گئی ہیں، جن میں رمضان میں عطیات جمع کرنے اور نماز کے مناظر نشر کرنے کے لیے کیمروں کے استعمال پر پابندی عائد کردی گئی۔
سعودی وزیر اسلامی امور و رہنمائی نے کہا ہے کہ رمضان المبارک کے دوران مساجد میں عطیات جمع کرنے پر پابندی ہوگی۔ تحریری ہدایت میں کہا گیا ہے کہ مساجد کے آئمہ اور موذن حضرات کے لیے ضروری ہے کہ ڈیوٹی کی مکمل پابندی کریں۔
آذان ام القری کیلنڈر میں مقررہ وقت پر دی جائے، عشاء کی آذان رمضان میں مقررہ وقت پر دی جائے، آذان کے بعد تکبیر کے دورانیہ کی پابندی کی جائے جبکہ انتہائی ضرورت کے علاوہ کسی حالت میں رمضان کے دوران ڈیوٹی سے غیرحاضر نہ ہوں۔ غیر حاضری کی صورت میں امامت اور آذان کے لیے متبادل انتظام کریں تاہم وزارت کی انتظامیہ سے اس کی منظوری لی جائے۔
سعودی اخبار کے مطابق سعودی عرب کے وزیر اسلامی امور و رہنمائی ڈاکٹرعبداللطیف آل شیخ نے رمضان سے قبل تمام مساجد میں ضروری انتظامات کا حکم جاری کرتے ہوئے کہا کہ رمضان المبارک میں عطیات جمع کرنے پر پابندی عائد کی گئی ہے۔
سعودی وزیر اسلامی امور نے یہ بھی ہدایت کی کہ اعتکاف کے لیے اجازت نامے امام مسجد جاری کریں گے اور وہی اس بات کے ذمہ دار ہوں گے کہ اعتکاف کرنے والے کوئی قانون کے خلاف کام نہ کریں۔
اعتکاف کرنے والوں کی نجی معلومات کا اندراج امام کی ذمہ داری ہوگی، اعتکاف کے خواہش مند غیرملکی سے کفیل کی منظوری کا خط بھی طلب کیا جائے گا۔
بیان میں مزید کہا گیا کہ افطار کرانے سمیت کسی بھی عنوان سے عطیات نہ جمع کیے جائیں، افطار دستر خوان کے سلسلے میں مقررہ ضوابط کی پابندی کریں۔
