کویت اردو نیوز ، 5 اکتوبر 2023: امریکا میں کار چوری اور بینک لوٹ کر فرار ہونے والا ڈاکو حادثے میں ہلاک ہوگیا۔
امریکی ریاست کنیکٹی کٹ کی پولیس کا کہنا ہے کہ جب مشتبہ شخص نے کار چوری کی تو پچھلی سیٹ پر ایک 17 ماہ کا بچہ موجود تھا۔ اس کے بعد وہ بینک لوٹ کر فرار ہوگیا۔ فرار کے دوران اس کی کار درخت سے ٹکرا گئی جس کے نتیجے میں ڈاکو ہلاک ہو گیا۔
حکام نے بتایا کہ ہارٹ فورڈ کے شمال میں واقع ونڈسر میں ہونے والے واقعے کے بعد بچہ جاگ رہا تھا اور بات کر رہا تھا۔
ونڈسر میں پولیس نے کہا کہ انہیں بدھ کی صبح 9 بجے کے فوراً بعد اطلاع ملی کہ کسی نے اسکول کے باہر سے ایک کار چوری کی ہے، جس میں پچھلی سیٹ پر ایک بچہ تھا۔ ہارٹ فورڈ کورنٹ کے مطابق، تھوڑی دیر بعد پولیس کو بینک ڈکیتی اور کار کے درخت سے ٹکرانے کی الگ الگ اطلاعات موصول ہوئیں۔
تینوں مقامات پر پولیس نے جوابی کارروائی کی۔
افسر نکولس ڈیلی نے بیان میں کہا ہے کہ "جب افسران نے ہر مقام پر معلومات اکٹھی کیں، تو یہ واضح ہو گیا کہ تینوں واقعات آپس میں جڑے ہوئے ہیں۔”
پولیس کا کہنا ہے کہ ان کا خیال ہے کہ ملزم نے بینک لوٹنے سے پہلے ایک اسکول کے سامنے کار چوری کی اور پھر فرار ہو کر چوری کی کار کو درخت سے ٹکرا دیا، تاہم حادثےمیں بچہ بال بال محفوظ رہا۔
ملزم کو موقع پر ہی مردہ قرار دے دیا گیا۔
بچے کی ماں جائے وقوعہ پر پہنچ گئی جہاں اسے بچے سمیت ہسپتال پہنچایا گیا۔ حادثہ میں بچہ بال بال بچ گیا۔
