حماس کی حمایت کرنے کی وجہ سے اسرائیلی اداکارہ گرفتار

کویت اردو نیوز ، 25 اکتوبر 2023: اسرائیلی عرب اداکارہ مائیسہ عبدالہادی کو فلسطینی مزاحمتی تنظیم حماس کی حمایت کرنے پر گرفتار کر لیا گیا۔

میڈیا رپورٹس کے مطابق اسرائیلی اداکارہ مائیسہ عبدالہادی نے سوشل میڈیا پر پوسٹ کی جس میں انہوں نے 7 اکتوبر کو اسرائیل پر حماس کے اچانک حملے کی حمایت کی۔

اسرائیلی پولیس نے مائیسہ عبدالہادی کو ان کی سوشل میڈیا پوسٹ کے بعد گرفتار کر لیا ہے، اسرائیلی پولیس نے اداکارہ کا نام لیے بغیر اپنے بیان میں کہا کہ انہوں نے حماس کی حمایت کرنے والی اداکارہ کو گرفتار کیا ہے۔

اسرائیلی پولیس کے بیان میں حماس کی جانب سے حملے کو دہشت گردی قرار دیتے ہوئے کہا گیا ہے کہ دہشت گردی کو اکسانے اور حمایت کرنے کے خلاف پولیس کی جنگ ہمہ وقت جاری رہتی ہے۔ پولیس نے بتایا کہ مائیسا، جو شمالی اسرائیل کے شہر ناصرت میں رہتی ہے، 26 اکتوبر تک حراست میں ہے۔

دوسری جانب اداکارہ کی ساتھی اداکارہ نے مائسیہ کی انسٹاگرام اسٹوری سوشل میڈیا پر پوسٹ کی جس میں انہوں نے حماس کی حمایت کی تھی ۔

اسرائیلی اداکار نے مائیسہ کو تنقید کا نشانہ بناتے ہوئے کہا کہ”میں آپ کی وجہ سےشرمندہ ہوں، آپکو اپنےآپ پرشرم آنی چاہیے، آپ ہمارےہی ٹی وی شوز اور فلموں میں اداکاری کرتی ہیں اور پھرہماری ہی پیٹھ میں چھرا گھونپتی ہیں،”