کویت اردو نیوز : امریکہ کی ریاست الاسکا کے ایک قصبہ میں 18 نومبرکو غروب ہونے والا سورج اب جنوری کے آخرمیں طلوع ہوگا۔
جی ہاں، یہ واقعی شمالی الاسکا کے قصبے اتقیاگوک میں ہوا۔ اس قصبے میں آخری بار سورج رواں سال 18 نومبر کو غروب ہوا تھا۔
اب یہ قصبہ 23 جنوری 2024 تک تاریکی میں ڈوبا رہے گا یا یوں کہہ لیں کہ 65 دن تک طلوع آفتاب کا نظارہ ممکن نہیں رہے گا۔
4000 آبادی والے اس قصبے میں 18 نومبر کو سورج 12:35 پر طلوع ہوا اور صرف ایک گھنٹہ 12 منٹ بعد 1 بج کر 48 منٹ پر غروب ہوا۔
آرکٹک سرکل میں واقع یہ قصبہ ہر سال قطبی رات کا تجربہ کرتا ہے۔
ایسا اس وقت ہوتا ہے جب زمین اپنے محور پر تھوڑا سا جھکتی ہے اور اس کے نتیجے میں آرکٹک سرکل میں سردیوں کے دوران سورج کئی ہفتوں تک غروب ہوتا ہے۔
اس کے برعکس، گرمیوں میں، یہ خطہ 24 گھنٹے سورج کی روشنی حاصل کرتا ہے اور اسے آدھی رات کے سورج کے نام سے جانا جاتا ہے۔
واضح رہے کہ کرہ ارض کے شمالی نصف کرہ میں جون کے آخر سے دن کا دورانیہ کم ہونا شروع ہو جاتا ہے تاہم شمالی علاقوں میں یہ اثر زیادہ نمایاں ہے۔ وہاں دن کی لمبائی ستمبر میں ہی بہت کم ہو جاتی ہے۔
دو ماہ طویل رات کے دوران، الاسکا کے اس شہر میں کچھ سورج کی روشنی نظر آئے گی، لیکن یہ عام غروب یا طلوع آفتاب نہیں ہوگا۔
مقامی لوگوں کے مطابق ہفتوں تک رہنے والا اندھیرا وٹامن ڈی کی کمی کا باعث بنتا ہے۔
یہ الاسکا کا واحد قصبہ نہیں ہے جو قطبی رات کا تجربہ کرے گا، لیکن سب سے زیادہ شمال کی طرف ہونے کی وجہ سے یہ یقینی طور پر پہلی جگہ ہے۔
