کویت اردو نیوز : انٹرنیشنل کرکٹ کونسل (آئی سی سی) ون ڈے ورلڈ کپ کے فائنل میں بھارت کی شکست کے بعد ایک بھارتی کرکٹ مداح دل کا دورہ پڑنے سے انتقال کر گیا جب کہ ایک کرکٹ مداح نے خودکشی کر لی۔
بھارتی میڈیا کے مطابق یہ افسوس ناک خبر 19 نومبر کو آسٹریلیا اور بھارت کے درمیان کھیلے گئے ورلڈ کپ کے فائنل کے بعد سامنے آئی۔
آسٹریلیا کے ہاتھوں بھارت کی فائنل میں شکست کے بعد ایک بھارتی کرکٹ مداح دل کا دورہ پڑنے سے انتقال کر گیا۔
میڈیا رپورٹس میں بتایا گیا کہ متوفی کا تعلق آندھرا پردیش کے تروپتی سے تھا۔ جیوتی کمار یادیو نامی 32 سالہ ہندوستانی کرکٹ شائقین سافٹ ویئر انجینئر تھا۔
یہی نہیں، اسی دن اس وقت ہندوستانی ماحول مزید سوگوار ہو گیا جب مغربی بنگال کے ایک 23 سالہ نوجوان نے ورلڈ کپ فائنل میں اپنی ٹیم کی شکست کے بعد خودکشی کر لی۔
واضح رہے کہ 19 نومبر کو احمد آباد کے نریندر مودی کرکٹ اسٹیڈیم میں کھیلے گئے ورلڈ کپ کے فائنل میں آسٹریلیا نے ناقابل شکست بھارت کو باآسانی شکست دی تھی۔ کینگروز ٹیم نے میزبان ٹیم کو 6 وکٹوں سے شکست دے کر چھٹی بار ورلڈ کپ کا فائنل جیت لیا۔
