کویت اردو نیوز : کیا آپ نے کبھی یہ خواہش کی ہے کہ جب ٹیلی ویژن بند ہو تو آپ مچھلی کا ایکویریم چلا سکتے ہیں ؟اگر ہاں تو یہ خواب پورا ہو گیا۔
دنیا کا پہلا ٹی وی متعارف کرا دیا گیا ہے جو وائرلیس ہونے کے ساتھ ساتھ ٹرانسپیرنٹ بھی ہے۔
جی ہاں، جب آپ ٹی وی نہیں دیکھ رہے ہوتے تو یہ شیشے کی طرح شفاف ہو جاتا ہے اور اسے چلانے کے لیے کسی تار کی ضرورت نہیں ہوتی۔
ایل جی نے اس ٹی وی کو لاس ویگاس میں کنزیومر الیکٹرانکس شو (سی ای ایس) میں متعارف کرا دیاہے ۔
کمپنی کے مطابق یہ دنیا کا پہلا وائرلیس ٹرانسپیرنٹ OLED TV ہے جو 4K ریزولوشن سے لیس ہے۔
یہ ٹی وی آڈیو اور ویڈیو چلانے کے لیے وائرلیس ٹرانسمیشن ٹیکنالوجی کا استعمال کرتا ہے۔
تاہم اس حوالے سے مزید تفصیلات جاری نہیں کی گئیں۔
کمپنی نے کہا کہ اس ٹی وی میں نیا پروسیسر استعمال کیا گیا ہے جس کی کارکردگی پچھلے پروسیسرز سے 4 گنا بہتر ہے۔
77 انچ اسکرین کے ساتھ یہ ٹی وی ہمیشہ آن ڈسپلے فیچر کے ذریعے تصاویر اور ویڈیوز کو اسٹریم کر سکتا ہے۔
جب آپ ٹی وی بند کرتے ہیں، تو سکرین پر ڈیجیٹل فش ایکویریم، آتش بازی یا دیگر ڈیجیٹل آرٹ نمودار ہوتا ہے۔
اگر آپ بند سکرین پر کچھ نہیں دیکھنا چاہتے تو بڑی کالی سکرین کے بجائے ٹی وی شفاف ہو جائے گا اور شیشے کی شکل اختیار کر کے آپ کے پیچھے کا منظر دکھائے گا۔
کمپنی کے مطابق چونکہ یہ ایک شفاف ٹی وی ہے اس لیے آپ اسے کسی بھی کمرے کے ماحول کا حصہ بنا سکتے ہیں۔
اس ٹی وی کی قیمت یا دستیابی کے بارے میں فی الحال کچھ نہیں کہا گیا ہے تاہم کمپنی کے مطابق یہ رواں سال کسی وقت صارفین کے لیے دستیاب ہوگا۔
