کویت اردو نیوز : ایک شخص کی اہلیہ جہاز میں وقت پر نہیں پہنچ سکی ، جس پر بم کی دھمکی دینے والے مسافر کو گرفتار کر لیا گیا ہے ۔
تفصیلات کے مطابق اپنی اہلیہ کے فلائٹ میں سوار نہ ہونے پر فلائٹ کو بم سے اڑانے کی دھمکی دینے والے مسافر کو ممبئی میں گرفتار کر لیا گیا ہے۔
مقامی پولیس کے مطابق 42 سالہ ولاس پاکڈے اور ان کی اہلیہ کو بنگلورو سے ممبئی جانے والی فلائٹ میں سوار ہونا تھا لیکن ولاس کی اہلیہ پرواز کے لیے بورڈنگ گیٹ پر دیر سے پہنچیں۔
پولیس نے بتایا کہ ولاس نے فلائٹ کسٹمر کیئر سروس سے پرواز میں تاخیر کرنے کے لیے کہا جس پر انتظامیہ نے انکار کر دیا اور جب اس کی اہلیہ نے فلائٹ مس کر دی تو ولاس نے پرواز میں تاخیر کے لیے بم کی دھمکی دے دی۔
پولیس کے مطابق بم کی دھمکی کے حوالے سے انتظامیہ نے فوری طور پر ایکشن لیتے ہوئے طیارے میں سوار افراد کی تلاشی شروع کر دی، کچھ نہ ملنے پر انتظامیہ نے شہری کے خلاف مقدمہ درج کر کے اس کو گرفتار کر لیا ہے ۔
