کویت اردو نیوز : سعودی عرب میں حج اور عمرہ کی سیکیورٹی فورسز نے مکہ کے باہر سے آنےوالے زائرین کیلیے پانچ پبلک ٹرانسپورٹ پوائنٹس قائم کیے ہیں، جہاں سے عازمین کو بسوں کے ذریعے مکہ کی عظیم الشان مسجد ، مسجد الحرام تک پہنچایا جائے گا۔
طائف الہدہ روڈ، اللیث روڈ، مکہ جدہ ایکسپریس وے، السیل روڈ اور مدینہ روڈ پر بس اسٹیشن قائم کیے گئے ہیں۔
اس سلسلے میں سرکاری محکمے سیکیورٹی، ٹرانسپورٹیشن، صفائی اور دیگر انتظامات کو بہتر بنانے اور زائرین کو سہولیات فراہم کرنے کیلیے کام کر رہے ہیں۔
واضح رہے کہ رمضان المبارک کے دوران ملک کے مختلف شہروں سے زائرین مختلف اوقات میں عمرہ ادا کرنے کیلیے مقدس شہر کا رخ کریں گے۔
اس کے علاؤہ لاکھوں نمازیوں نے مسجد الحرام اور مسجد نبوی صلی اللہ علیہ وآلہ واصحابہ وسلم میں رمضان المبارک کی پہلی تراویح ادا کی۔
سعودی عرب میں آج پہلا روزہ ہے۔ ماہ رمضان کے آغاز پر لاکھوں افراد نے گزشتہ رات مسجد نبوی میں تراویح کی نماز ادا کی۔ پہلی نماز تراویح مسجد قباء اور مسجد قبلتین میں بھی ادا کی گئی۔
اس سال رمضان المبارک کے دوران مکہ، مدینہ اور جدہ کے لیے روزانہ ٹرین سروس چلائی جائیگی۔ حرمین شریفین کے متولی شاہ سلمان بن عبدالعزیز اور ولی عہد اور وزیر اعظم شہزادہ محمد بن سلمان نے رمضان المبارک کے بابرکت مہینے کے موقع پر مملکت کے تمام شہریوں اور دنیا بھر کے مسلمانوں کو مبارکباد پیش کی ہے۔