کویت اردو نیوز : پاک بحریہ اور پاکستان میری ٹائم سیکیورٹی ایجنسی نے انسانی ہمدردی اور سلوک کی اعلیٰ مثال قائم کرتے ہوئے بحیرہ عرب میں پھنسے 9 بھارتی شہریوں کی جانیں بچا لی۔
ترجمان پاک بحریہ کا کہنا ہے کہ پاک بحریہ کے جوائنٹ میری ٹائم انفارمیشن اینڈ کوآرڈینیشن سینٹر کو SAS-5 نامی کشتی سمندر میں پھنسی ہونے کی ہنگامی کال موصول ہوئی۔ کشتی میں فنی خرابی کےباعث انجن مکمل طورپربندہوگیا۔
ترجمان کے مطابق کشتی میں سوار 9 بھارتی شہری گزشتہ 24 گھنٹوں سے بے یارو مددگار سمندر میں پھنسے ہوئے تھے۔ اطلاع ملنے پر پاکستان نیوی اور پاکستان میری ٹائم سیکیورٹی ایجنسی نے کشتی کی تلاش اور ریسکیو کے لیے لانگ رینج میری ٹائم پیٹرول ایئر کرافٹ اور پی ایم ایس ایس کشمیر کو تعینات کیا اور عملے کو طبی امداد فراہم کی۔
تکنیکی خرابی دور ہونے کے بعد کشتی اپنی منزل کی جانب روانہ ہوگئی۔ ترجمان پاک بحریہ کے مطابق پریشان کن کشتی 4 فروری کو بھارتی بندرگاہ دابھول سے شارجہ کے لیے روانہ ہوئی تھی۔ کشتی کے عملے کی جانب سے پاک بحریہ اور پاکستان میری ٹائم سیکیورٹی ایجنسی کی بروقت کارروائی اور پیشہ ورانہ مہارت کو سراہا گیا۔
