آؤ اورلےجاؤ ؛ حکومت کا عوام کو اقساط میں آئی فون دینے کا اعلان

کویت اردو نیوز : پاکستان کی نگراں حکومت نے عوام کے لیے آئی فونز کے لیے قسطوں کا منصوبہ شروع کرنے کا اعلان کیا ہے جس کا آغاز 12 جنوری 2024 سے ہوگا۔

نگراں وفاقی وزیر برائے انفارمیشن ٹیکنالوجی عمر سیف نے 12 جنوری 2024 کو ایک اقدام شروع کرنے کے لیے ٹیلی کام اسٹیک ہولڈرز کے ساتھ تعاون کی تفصیلات جاری کیں۔

اس سے قبل انہوں نے اکتوبر 2023 میں یہ اعلان کیا تھا۔

اس وقت ڈاکٹر عمر سیف نے کہا تھا کہ پاکستان میں بہت سے لوگ فون استعمال کرتے ہیں، لیکن وہ سستے فون ہیں، کیونکہ ایک ساتھ 80 ہزار، 2 لاکھ یا 3 لاکھ کا فون خریدنا ہر کسی کے بس میں نہیں ہوتا۔

اب اس منصوبے کا اعلان کرتے ہوئے ڈاکٹر عمر سیف نے کہا کہ یہ پروگرام صارفین کو آسان اقساط کے ذریعے جدید ترین ماڈل فون حاصل کرنے کے قابل بنائے گا۔

نگراں وفاقی وزیر نے کہا کہ اس آفر میں آئی فونز بھی شامل ہوں گے۔

انہوں نے کہا کہ پاکستان ٹیلی کمیونیکیشن اتھارٹی (پی ٹی اے) قسطوں کی ادائیگی میں ناکامی کی صورت میں ہینڈ سیٹس کو بلاک کرنے کے لیے ڈیوائس آئیڈنٹیفکیشن، رجسٹریشن، اور بلاکنگ سسٹمز (DIRBS) کو نافذ کرے گی۔

انہوں نے واضح کیاہےکہ اس پالیسی کابنیادی مقصد ذمہ دارانہ مالیاتی رویےکو فروغ دینا اور ملک میں اسمارٹ فونز کی رسائی کی مسلسل توسیع کو یقینی بنانا بھی ہے۔

وفاقی وزیر نے کہا کہ ٹیلی کام کمپنیاں اقساط کے منصوبوں کے ذریعے صارفین کو براہ راست اسمارٹ فون فراہم کرکے اہم کردار ادا کرنے کے لیے تیار ہیں، اس طرح موبائل براڈ بینڈ کے فوائد خاص طور پر کم آمدنی والے طبقے تک پہنچ سکتے ہیں۔