کویت اردو نیوز 20 جون: 15 ماہ کی طویل بندش کے بعد دبئی انٹرنیشنل ایئرپورٹ کا ٹرمینل 1 مسافروں کی آمد کے لئے دوبارہ بحال کر دیا گیا ہے۔
تفصیلات کے مطابق کرونا وبا میں کمی کے نتیجے میں دبئی ہوائی اڈے کے آپریٹرز نے توقع کی ہے کہ دبئی انٹرنیشنل ایئرپورٹ کو آنے والے دنوں میں مسافروں کی ایک بڑی تعداد کا سامنا کرنا پڑ سکتا ہے۔ وبا میں کمی کے بعد دبئی انٹرنیشنل ایئرپورٹ سے رواں سال 28 ملین مسافروں کی آمد کا امکان ہے جس میں گذشتہ برس کی نسبت آٹھ فی صد اضافے کی توقع کی جا رہی ہے۔ دبئی انٹرنیشنل ایئرپورٹ پر ٹرمینل 1 جمعرات کو دوبارہ کھول دیا گیا۔ یہ ٹرمینل کرونا وبا کی وجہ سے15 مہینوں کے بعد کھولا گیا ہے۔ بندش کے دوران ہوائی اڈے کے ٹرمینل دو اور تین کو فعال رکھا گیا۔
دبئی کے ہوائی اڈے کے چیف ایگزیکٹو پال گریفتھس نے اتوار کے روز رائٹرز کو بتایا کہ "لوگوں کا خیال ہے کہ مسافروں کی واپسی سست روی سے ہوگی لیکن میرا خیال مختلف ہے کیونکہ مجھے لگتا ہے کہ دبئی کے بین الاقوامی ہوائی اڈے پر مسافروں کا ایک سیلاب آنے والا ہے”۔ انہوں نے مزید کہا کہ "اگر ہم واقعی خوش قسمت ہیں تو دُنیا کا یہ مصروف ترین ہوائی اڈہ اس سال 40 ملین سے زیادہ مسافروں کا ہدف پورا کرسکتا ہے لیکن ممکن ہے کہ مسافروں کی تعداد 24.7 اور 34.3 ملین کے درمیان ہو”۔ انہوں نے مزید کہا کہ ہمیں تقریبا 28 ملین مسافروں کی امید ہے۔ ہوائی اڈے پر ٹرمینل 1 کی سالانہ گنجائش 18 ملین مسافروں پر مشتمل ہے۔ ہوائی اڈےپر مجموعی طور پر سالانہ 100 ملین مسافروں کو آمد ورفت کی سہولت دی جا سکتی ہے۔ گریفتھس نے اندازہ لگایا ہے کہ ٹرمینل کو دوبارہ کھولنے سے ہوائی اڈے پر ملازمت
کے 3500 مواقع پیدا ہوں گے جن میں پرچون ، مہمان نوازی ، سیکیورٹی اور امیگریشن کارکن شامل ہیں۔ انہوں نے مزید کہا کہ کرونا وبا کے زوال کے بعد دبئی ایئرپورٹ سے 260 مختلف روٹس پر 90 فی صد پروازیں بحال ہوسکتی تھیں۔ اس وقت63 فی صد پروازیں بحال ہوئی ہیں۔ یاد رہے کہ دبئی نے بدھ سے بھارت ، نائیجیریا اور جنوبی افریقہ کے مسافروں پر کچھ پابندیاں نرم کرنے کا اعلان کیا ہے۔
