کویت اردو نیوز : مدینہ منورہ ریجن کے المہد کمشنریٹ میں ٹریفک خلاف ورزیوں کے مانیٹرنگ سسٹم ‘ساھر’ کو تباہ کرنے والے پاکستانی شہری کو گرفتار کر لیا گیا۔
عاجل نیوز نے ریجن پولیس کی جانب سے جاری کردہ بیان کے حوالے سے مزید کہا ہے کہ المہد کمشنریٹ ہائی وے پر نصب گاڑیوں کی رفتار کی نگرانی کے نظام کے تباہ ہونے کی اطلاع ملنے پر تحقیقات کی گئیں۔
مقرر کردہ تفتیشی ٹیم نے نظام کو تباہ کرنے والے ملزم کو گرفتار کر لیا ہے جس کا تعلق پاکستان سے ہے۔
ملزم کے خلاف مقدمہ درج کر کے اسے پراسیکیوشن کے حوالے کر دیا گیا جہاں اس کے خلاف سرکاری املاک کو تباہ کرنے کا مقدمہ قائم کیا جائے گا۔
واضح رہے کہ سعودی عرب کے تمام علاقوں خصوصاً شاہراہوں پر گاڑیوں کی رفتار ریکارڈ کرنے کے نظام موجود ہیں تاکہ ٹریفک حادثات کو روکا جا سکے۔
گاڑی کی رفتار ریکارڈ کرنے کا نظام ‘ساھر’ کہلاتا ہے۔ سسٹم میں نصب انتہائی حساس کیمروں کے ذریعے تیز رفتار گاڑیوں کی تفصیلات ٹریفک پولیس کے مرکزی کنٹرول روم کو بھیجی جاتی ہیں۔
ٹریفک پولیس کے مرکزی کنٹرول روم سے خلاف ورزی کا اندراج ہونے پر گاڑی کے مالک کو چالان بھیجا جاتا ہے۔ خیال رہے کہ ساھر سسٹم کا مقصد لوگوں کو تیز رفتاری سے روکنا ہے تاکہ حادثات پر قابو پایا جا سکے۔