کویت اردو نیوز ، 18 اکتوبر 2023 : سکاٹ لینڈ کے فرسٹ منسٹر حمزہ یوسف نے غزہ کے شہریوں کو سیاسی پناہ دینے کا اعلان کر دیا۔
غیر ملکی خبر رساں ادارے کے مطابق سکاٹ لینڈ کے فرسٹ منسٹر حمزہ یوسف نے سکاٹش نیشنل پارٹی کے سالانہ اجلاس میں کہا کہ جہاں تک ممکن ہو سکے غزہ کے زخمی بچوں، خواتین اور مردوں کا علاج کیا جائے گا۔
انہوں نے کہا کہ ماضی میں سکاٹ لینڈ کے لوگوں نے مہاجرین کے لیے اپنے دل اور گھر کھولے تھے۔
فرسٹ منسٹر حمزہ یوسف نے کہا کہ ماضی میں شام، یوکرین سمیت کئی ممالک کے لوگوں کو پناہ دی گئی اور مہاجرین کے لیے مکمل تعاون کیا گیا۔
اسرائیلی فوج نے گزشتہ روز غزہ میں اسپتال پر حملہ کیا تھا جس میں 500 سے زائد فلسطینی شہید ہوگئے تھے۔ جس میں زخمیوں اور بیماروں کی بڑی تعداد شامل تھی۔ واضح رہے کہ سکاٹش فرسٹ منسٹر حمزہ یوسف ایک پاکستانی نژاد ہیں جن کے آباؤ اجداد عرصہ دراز سے سکاٹ لینڈ میں مقیم ہیں۔
