کویت اردو نیوز : باچا خان چوک پیر آباد کالونی کے قریب گھر میں فائرنگ سے شوہر جاں بحق اور بیوی زخمی ہوگئی۔
پولیس نے فائرنگ کرنے والے زخمی خاتون کے بھانجے کو گرفتار کرکے آلہ قتل برآمد کرلیا۔
پیر آباد تھانے کی حدود باچا خان چوک محمدی مسجد کے قریب گھر پر فائرنگ سے ایک شخص جاں بحق جب کہ خاتون شدید زخمی ہوگئی جسے فوری طور پر عباسی شہید اسپتال منتقل کردیا گیا۔
جاں بحق ہونے والے شخص کی شناخت 45 سالہ میرافضل ولد طالب خان اور زخمی خاتون کی شناخت 35 سالہ سائرہ بی بی کے نام سے ہوئی ہے۔ دونوں میاں بیوی ہیں۔
تھانہ پیر آباد کے ڈیوٹی آفیسر شفیق نے بتایا کہ زخمی خاتون نے مقتول میرافضل سے دوسری شادی کی تھی۔ دونوں واپس افغانستان جا رہے تھے۔
زخمی خاتون اپنی بیٹی کو اپنے پہلے شوہر سے افغانستان لے جانا چاہتی تھی لیکن لڑکی نے اپنی والدہ کے ساتھ جانے سے انکار کرتے ہوئے کہا کہ وہ پاکستان میں اپنے چچا کے ساتھ رہے گی۔ گزشتہ روز بچی کو لینے رشتہ دار کے گھر پہنچنے پر متوفی اور اس کی اہلیہ کے درمیان جھگڑا ہو گیا جس کے دوران فائرنگ سے میرافضل جاں بحق اور خاتون سائرہ زخمی ہو گئی۔
پولیس افسر کے مطابق فائرنگ زخمی خاتون کے بھانجے ابوبکر نے کی، جسے پولیس نے گرفتار کر کے آلہ قتل برآمد کر لیا ہے۔
