کویت اردو نیوز،13جولائی: سعودی نے سویڈن میں قرآن پاک کو جلانے کی ناپاک جسارت کی شدید الفاظ میں مذمت کرتے ہوئے کہا کہ ایسے گھناؤنے کام کا کوئی جواز قبول نہیں کیا جائیگا۔
سعودی وزیر خارجہ شہزادہ فیصل بن فرحان نے انسانی حقوق کونسل کے ہنگامی اجلاس سے ورچوئل خطاب میں بین المذاہب ہم آہنگی کے فروغ پر زور دیتے ہوئے کہا کہ عالمی برداری توہین مذہب کے واقعات کے سدباب کے لیے اپنا کردار ادا کرے۔
سعودی وزیر خارجہ کا کہنا ہے کہ انتہا پسندوں کی جانب سے قرآن پاک کو نذر آتش کرنا مذہبی رواداری کیخلاف ہے اور یہ نفرت، تعصب اور نسل پرستی کو ہوا دیتا ہے۔ مسلمانوں کی مقدس کتاب کو بار بار جلانا تشویشناک ہے۔
وزیر خارجہ فیصل بن فرحان نے اقوام متحدہ سے مخاطب ہوتے ہوئے کہا کہ سعودی عرب مذہبی منافرت کا مقابلہ کرنے کے لیے قرارداد کے مسودے کی منظوری کا منتظر ہے۔ عالمی برادری اور تنظیموں کو ایسے جارحانہ واقعات کے سدباب کیلئے اقدامات کرنا ہوں گے۔