کویت اردو نیوز ، 15 اکتوبر 2023: سعودی ولی عہد محمد بن سلمان نے امریکی وزیر خارجہ انتھونی بلینکن سے ملاقات میں کہا کہ ہمیں غزہ میں اسرائیل کی فوجی کارروائیوں کو روکنے کے لیے کام کرنا چاہیے۔
عالمی خبر رساں ادارے کے مطابق امریکی وزیر خارجہ اینٹونی بلنکن اسرائیل کے دورے کے بعد سعودی عرب پہنچ گئے اور ولی عہد شہزادہ محمد بن سلمان سے ملاقات کی۔
ملاقات میں ولی عہد نے موجودہ کشیدگی کو روکنے اور بین الاقوامی قوانین کا احترام کرنے سمیت غزہ کی صورتحال کے استحکام اور بحالی پر زور دیا۔
سعودی ولی عہد نے یہ بھی مطالبہ کیا کہ غزہ کا فوجی محاصرہ ختم کیا جائے اور عوام تک امداد پہنچائی جائے اور کشیدگی کے خاتمے کے لیے بین الاقوامی کوششیں تیز کی جائیں۔
ولی عہد شہزادہ محمد بن سلمان نے امریکی وزیر خارجہ انتھونی بلینکن کے ساتھ بات چیت میں مزید کہا کہ غزہ میں اسرائیلی فوج کی کارروائیوں کو روکنا اور معصوم لوگوں کی جانیں بچانا اولین ترجیح ہونی چاہیے۔
ولی عہد شہزادہ محمد بن سلمان نے اس بات پر بھی زور دیا کہ امن کے حصول کو یقینی بنانے کے لیے فلسطینی عوام کو ناجائز قبضے کو ختم کر کے ان کے جائز حقوق فراہم کیے جائیں۔
اس ملاقات میں امریکہ میں سعودی عرب کی سفیر شہزادی ریما بنت بندر بن سلطان اور وزیر خارجہ شہزادہ فیصل بن فرحان بھی موجود تھے جب کہ سعودی عرب میں امریکی سفیر مائیکل رتنی اور امریکی محکمہ خارجہ کے مشیر بھی موجود تھے.
