کویت اردو نیوز ، 19 اکتوبر 2023: نوجوان کو نیم برہنہ حالت میں بیلٹ سے پیٹنے اور کتے کی طرح بھونکنے پر مجبور کرنے کا افسوسناک واقعہ وائرل ہوگیا ۔
بھارتی ریاست مدھیہ پردیش سے سامنے آنے والی یہ ویڈیو نامعلوم جنگلاتی علاقے کی ہے، جس میں دو افراد ایک نیم برہنہ شخص کو بیلٹ سے پیٹ رہے ہیں، اسے کتے کی طرح بھونکنے پر مجبور کر رہے ہیں ۔
بتایا جا رہا ہے کہ حالیہ دنوں میں وائرل ہونے والا ویڈیو ایک سال پہلے کا ہے، تاہم پولیس نے کارروائی کرتے ہوئے اس سلسلے میں تحقیقات شروع کر دی ہیں۔
پولیس کا کہنا ہے کہ تشدد کا نشانہ بننے والا شخص قتل کے مقدمے کا گواہ ہے، جب اس نے اپنا بیان بدلنے سے انکار کیا تو اسے اغوا کیا گیا، تشدد کا نشانہ بنایا گیا اور اس کی ویڈیو بنائی گئی۔
ایک سینئر پولیس افسر نے بتایا کہ سوشل میڈیا پر ویڈیو وائرل ہونے کے بعد پولیس نے ملزمان کو حراست میں لے کر پوچھ گچھ کی تو پتہ چلا کہ یہ واقعہ ایک سال قبل پیش آیا تھا۔
جب یہ واقعہ سامنے آیا تو تشدد کا نشانہ بننے والے یا اس کے اہل خانہ کی جانب سے پولیس سے رابطہ نہیں کیا گیا، تاہم حکام نے کہا کہ وہ ان سے رابطہ کریں اور شکایت درج کریں تاکہ ملزمان کے خلاف کارروائی کی جاسکے۔
