کویت اردو نیوز : خاندان کے بعد سب سے مخلص رشتہ ‘دوست’ کا ہوتا ہے، دوست کی قدم قدم پر انسان کو ضرورت ہوتی ہے۔
جب دوستی کے بارے میں کوئی پیار بھرا جملہ یا جذبات سے بھرپور ویڈیو گزرتی ہے تو انسان بچپن کی دوستی میں کھو جاتا ہے۔
ایسی ہی ایک ویڈیو سوشل میڈیا پر وائرل ہو رہی ہے جس نے تقریباً سبھی کو جذباتی کر دیا ہے، آٹھ سالہ بچے کی اس ویڈیو نے سب کا دل جیت لیا ہے۔
کولمبیا سے تعلق رکھنے والا اینجل ڈیوڈ اپنی 8ویں سالگرہ بہترین انداز میں منانا چاہتا تھا لیکن ماں کی محدود آمدنی کی ستم ظریفی نے اس بچے کو اس معصوم خواہش کو پورا کرنے سے روک دیا۔
لیکن آٹھ سالہ اینجل ڈیوڈ کے دوستوں نے اس کی سالگرہ کو خاص بنا دیا، اساتذہ اور ساتھی طالب علموں کو اینجل ڈیوڈ کی مالی صورتحال کا بخوبی اندازہ تھا۔
انہوں نے اینجل ڈیوڈ کے لیے ایک سرپرائز منصوبہ بنایا، جیسے ہی اینجل ڈیوڈ جماعت میں داخل ہوا، اس کے دوستوں نے مل کر سالگرہ کا گانا ‘ہیپی برتھ ڈے’ گایا۔
اینجل ڈیوڈ اپنے ساتھی طالب علموں کے سرپرائز سے متاثر ہوا اور اس کی آنکھوں سے خوشی کے آنسو بہہ نکلے، کیونکہ اس کی زندگی میں یہ پہلا موقع ہے کہ اس نے اس طرح سالگرہ منائی ہو۔
ویڈیو کو سوشل میڈیا صارفین کی جانب سے خوب پسند کیا گیا، اساتذہ اور ساتھی طلبہ کو بھی صارفین نے خوب سراہا۔
ویڈیو کو1 ملین سے زیادہ لائیکس کے ساتھ 25 ملین سے زیادہ بار دیکھا جا چکا ہے۔
