کویت اردو نیوز : ایک فلسطینی گلوکار غزہ میں اسرائیلی فوجی کے ہاتھ میں اپنا 15 سال پرانا گٹار دیکھ کر حیران رہ گیا۔
گزشتہ ماہ 7 اکتوبر سے غزہ پر قابض اسرائیلی فوجیوں نے فلسطینی شہریوں سے نہ صرف ان کے پیاروں کو چھین لیا ہے بلکہ ان کے گھروں اور سامان پر بھی قبضہ کر رکھا ہے۔
گزشتہ روز حماد نامی فلسطینی گلوکار اور موسیقار نے اپنے آفیشل انسٹاگرام اکاؤنٹ پر ایک ویڈیو پوسٹ کی جس میں ایک اسرائیلی فوجی کو غزہ میں ملبے کے ڈھیر پر کھڑے ہو کر گٹار بجاتے ہوئے دیکھا جا سکتا ہے۔
اس کے ساتھ فلسطینی گلوکار نے اپنی ایک ویڈیو بھی پوسٹ کی جس میں وہی گٹار ان کے ہاتھ میں ہے اور وہ گا رہے ہیں۔
گلوکار حماد نے ویڈیو پوسٹ کرتے ہوئے کہا کہ میں آج اس وقت حیران رہ گیا جب میں نے غزہ کے ملبے پر کھڑے اسرائیلی فوجی کی ٹک ٹاک ویڈیو دیکھی جو گٹار بجا رہا ہے۔
حماد نے کہا، "میں اس گٹار کو اچھی طرح جانتا ہوں کیونکہ غزہ میں ایسے کوئی گٹار نہیں ہیں۔”یہ میرے والد نے مجھے گفٹ دیا تھا اب ان کا انتقال ہو گیا ہے۔”
انہوں نے کہا کہ "اسرائیلی فوجیوں نے ہم سے ہمارے پیارے، ہمارے گھر، ہمارے خاندان اور اب ہماری موسیقی اور زندگی کی حسین یادیں چھین لی ہیں، یہ ظلم کب رکے گا؟”
واضح رہے کہ 7 اکتوبر سے اسرائیلی حملوں میں شہید ہونے والے فلسطینیوں کی تعداد 14 ہزار سے تجاوز کر گئی ہے جن میں 6 ہزار بچے بھی شامل ہیں۔
