کویت اردو نیوز : حماس نے امریکی ارب پتی اور ایکس کے مالک ایلون مسک سے کہا ہے کہ وہ اسرائیل کی طرح تباہ حال غزہ کا دورہ کریں اور اسرائیل کے ہاتھوں فلسطینیوں کی تباہی کو اپنی آنکھوں سے دیکھیں۔
بیروت میں پریس کانفرنس کرتے ہوئے حماس کے سینئر رہنما اور ترجمان اسامہ ہمدان نے کہا کہ جس طرح ایلون مسک نے اسرائیل کا دورہ کیا ہے، انہیں اب غزہ کا دورہ بھی کرنا چاہیے اور اسرائیلی بمباری سے غزہ کی تباہی کو دیکھنا چاہیے۔
اسامہ ہمدان نے کہا کہ غزہ کا دورہ کرکے ایلون مسک کو یہ بھی سمجھ میں آئے گا کہ اسرائیل نے گزشتہ ماہ 7 اکتوبر سے عارضی جنگ بندی تک غزہ میں کس طرح قتل عام اور وحشیانہ بمباری کی۔
پریس کانفرنس میں انہوں نے یہ بھی کہا کہ اسرائیلی جیلوں سے رہائی پانے والے فلسطینیوں نے اسرائیل کے وحشیانہ رویے پر بات کی ہے۔
انہوں نے مزید کہا کہ ہم نے اپنے فلسطینی قیدیوں کی وجہ سے اسرائیلیوں کو یرغمال بنایا، اگر ان کے پاس ہمارے قیدی نہ ہوتے تو ہمیں اسرائیلیوں کو یرغمال بنانے کی ضرورت ہی نہ پڑتی۔
واضح رہے کہ حال ہی میں ایلون مسک نے اسرائیل کا دورہ کیا، ایلون مسک نے نیتن یاہو سے اتفاق کیا کہ حماس کو تباہ کرنے کے علاوہ کوئی چارہ نہیں۔
اسرائیلی وزیراعظم نیتن یاہو نے کہا کہ اگر آپ غزہ میں امن، سلامتی اور بہتر زندگی چاہتے ہیں تو آپ کو حماس کو ہمیشہ کے لیے ختم کرنا ہوگا ۔
جس پر ایکس کے مالک ایلون مسک نے نیتن یاہو سے کہا کہ میں آپ سے مکمل اتفاق کرتا ہوں کیونکہ اس کے علاوہ کوئی چارہ نہیں، حماس یہودیوں کی نسل کشی کرنا چاہتی ہے۔
