کویت اردو نیوز : سوئٹزرلینڈ کے شہر میونخ سے بنکاک جانے والی جرمن ایئر لائن Lufthansa کی پرواز کو میاں بیوی کے درمیان لڑائی کے باعث بھارت کے دارالحکومت نئی دہلی میں لینڈ کرنا پڑا۔
بھارتی میڈیا کے مطابق بدھ کو میونخ سے بنکاک جانے والی پرواز کو مسافروں کے درمیان لڑائی کے باعث نئی دہلی میں اتار دیا گیا۔
ذرائع کا کہنا ہے کہ لفتھانزا کی پرواز ایل ایچ 772 کے عملے نے بتایا کہ فلائٹ میں میاں بیوی کے درمیان جھگڑا ہوا۔
نئی دہلی کے اندرا گاندھی بین الاقوامی ہوائی اڈے کے ایوی ایشن سیکیورٹی نے اے این آئی کو بتایا کہ میاں بیوی کے درمیان لڑائی کی وجہ ابھی تک معلوم نہیں ہوسکی ہے لیکن اس لڑائی کی وجہ سے فلائٹ کو نئی دہلی میں اتار دیا گیا۔
نئی دہلی میں لینڈنگ سے قبل پرواز نے پاکستان میں لینڈنگ کی اجازت مانگی جسے پاکستان نے نامعلوم وجوہات کی بنا پر مسترد کر دیا جس کے بعد پرواز نئی دہلی میں لینڈ کر گئی۔
پرواز نئی دہلی میں اترنے کے بعد جھگڑا کرنے والے جوڑے کو طیارے سے اتار کر سکیورٹی حکام کے حوالے کر دیا گیا۔
دوسری جانب لفتھانسا ایئرلائنز کی جانب سے جاری بیان میں کہا گیا ہے کہ بدھ 29 نومبر کو میونخ سے بنکاک جانے والی پرواز ایل ایچ 772 کو مسافروں کے درمیان لڑائی کے باعث دہلی میں اتار دیا گیا۔ لڑنے والے جوڑے کو سکیورٹی کے حوالے کر دیا گیا ہے۔ پرواز تھوڑی تاخیر کے بعد بنکاک کے لیے روانہ ہوگئی ۔
واضح رہے کہ اس سے قبل گزشتہ ماہ دہلی سے مصر جانے والی پرواز میں ایک مسافر کی دیگر مسافروں سے لڑائی ہوئی تھی اور اس نے جہاز کی سیٹیں توڑ دی تھیں جس کے بعد اسے دہلی پولیس کے حوالے کر دیا گیا تھا۔
