کویت اردو نیوز : چین کے جنوبی علاقے سنکیانگ میں پیر کی شب ریکٹر اسکیل پر 7.2 کی شدت سے زلزلے کے جھٹکے محسوس کیے گئے۔ زلزلہ پیما مرکز کے مطابق زلزلے کا مرکز چین کے جنوبی علاقے سنکیانگ میں 80 کلومیٹر کی گہرائی میں تھا۔ دہلی میں بھی زلزلے کے جھٹکے محسوس کیے گئے۔
زلزلے کے نتیجے میں متعدد افراد زخمی ہوئے ہیں، اطلاعات کے مطابق چین اور کرغزستان کی سرحد پر بھی کئی مکانات گر گئے ہیں۔
سنکیانگ کے محکمہ ریلوے نے زلزلے کے واقعے کے بعد فوری کارروائی کرتے ہوئے آپریشن روک دیا اور 27 ٹرینوں کی روانگی معطل کردی۔
چینی میڈیا کے مطابق زلزلے کا مرکز ووشی کاؤنٹی میں تھا جہاں 14 زلزلے محسوس کیے گئے جن میں سے سب سے زیادہ زلزلے کی شدت 5.3 ریکارڈ کی گئی۔
کرغزستان کے مقامی حکام نے اپنی سرحد کے قریب زلزلہ متاثرین کے زخمی ہونے کی اطلاع دی ہے۔
چین اور کرغزستان کی سرحد پر سنکیانگ میں صبح 7.0 شدت کے زلزلے کے جھٹکے محسوس کیے گئے۔
زلزلے نے بڑے پیمانے پر نقصان پہنچایا اور ووشی کاؤنٹی کے دیہی علاقوں میں دو رہائشی مکانات اور مویشیوں کے گودام منہدم ہوگئے۔ کم از کم تین افراد کے زخمی ہونے کی اطلاعات کے بعد حکام نے ڈیزاسٹر ریلیف ٹیموں کو متاثرہ علاقوں میں روانہ کر دیا ہے۔
سوشل میڈیا پلیٹ فارمز پر گردش کرنے والی ویڈیو فوٹیج میں دیکھا جا سکتا ہے کہ گھریلو سامان فرش پر پڑا ہوا ہے اور شہری محفوظ مقامات کی تلاش میں گھروں سے باہر نکل آئے ہیں۔
کرغزستان کے دارالحکومت بشکیک سے موصولہ اطلاعات کے مطابق زلزلے کے باعث دیواریں ہل گئیں۔ اگرچہ بشکیک میں کسی جانی یا مالی نقصان کی کوئی اطلاع نہیں ہے تاہم چین اور قازقستان کے پڑوسی دیہاتوں میں زلزلے کے جھٹکے محسوس کیے گئے ہیں۔
ابتدائی زلزلے کے بعد چھوٹے آفٹر شاکس آئے، جن میں سے کچھ کی شدت 5.5 تک تھی۔ قازقستان کے سب سے بڑے شہر الماتی میں شہری احتیاط کے طور پر باہر نکل آئے۔
یہ زلزلہ جنوب مغربی چین میں ایک تباہ کن مٹی کے تودے گرنے کے ایک دن بعد آیا جس میں درجنوں افراد ہلاک اور دب گئے۔
یہ خطہ اب بھی شمال مغربی چین میں دسمبر میں آنے والے زلزلے کے آفٹر شاکس سے دوچار ہے جس میں سینکڑوں افراد ہلاک اور ہزاروں بے گھر ہو گئے تھے۔