کویت اردو نیوز : سعودی حکام نے حرمین شریفین میں نعرے لگانے والوں کو وارننگ جاری کر دی ہے۔ حرمین میں صرف لبیک اللہم لبیک کا نعرہ لگایا جا سکتا ہے۔
الحرمین الشریفین انتظامیہ میں مذہبی امورکےسربراہ شیخ ڈاکٹرعبدالرحمان السدیس نےیوم تاسیس کےموقع پرمیڈیاسےگفتگو کرتےہوئےکہاہےکہ حرمین شریفین کی سلامتی ایک سرخ لکیر ہے جہاں ‘لبیک اللہم لبیک’ کے سوا کوئی نعرہ قابل قبول نہیں۔
مسجد الحرام میں امن و امان کے حوالے سے انہوں نے واضح کیا کہ حرم شریف میں امن و امان کی گہری مذہبی جڑیں ہیں کیونکہ امن و امان کا تعلق حرم سے ہے ۔
انہوں نے مزید کہا کہ زائرین انتظامیہ کی ہدایات پر عمل کریں، سیکیورٹی اہلکاروں کے ساتھ تعاون کریں تاکہ وہ آسانی اور سہولت کے ساتھ اپنی مناسک ادا کرسکیں۔
عرب میڈیا رپورٹس کے مطابق حرمین شریفین انتظامیہ میں مذہبی امور کے سربراہ شیخ ڈاکٹر عبدالرحمن السدیس نے کہا کہ یوم تاسیس صرف تاریخ اور اعداد ہی نہیں بلکہ ایک عظیم یادگار ہے۔
شیخ السدیس نے زائرین کو خبردار کیا کہ حرم شریف میں آنے والے زائرین اس بات کا خیال رکھیں کیونکہ حرم میں امن و امان ایک سرخ لکیر ہے، جسے نظر انداز نہیں کیا جا سکتا۔
انہوں نے حرم شریف کی حرمت اور عبادات کو یقینی بنانے پر زور دیا اور زائرین سے کہا کہ وہ مقدس مقام پر عبادت میں وقت گزاریں۔
جبکہ انہوں نے خبردار کیا کہ حرمین شریفین میں عبادت اور تلبیہ کے علاوہ نعرے لگانے والوں سے سختی سے نمٹنے کے لیے سیکیورٹی اہلکار ہمہ وقت تیار ہیں۔
واضح رہے کہ اس سے قبل 2022 میں پاکستان کی سابق وزیر اطلاعات مریم اورنگزیب کے ساتھ مسجد نبوی صلی اللہ علیہ وآلہ واصحابہ وسلم میں کچھ زائرین نے بدتمیزی کی تھی، زائرین نے مسجد نبوی کے صحن میں سیاسی نعرے بازی شروع کردی تھی۔
