کویت اردو نیوز 18 مئی: کراچی میں بارش اور آندھی کے باعث حادثات میں بچے سمیت 4 افراد جاں بحق ہوگئے۔
تفصیلات کے مطابق کراچی کے مختلف علاقوں میں تیز بارش اور آندھی کے باعث حادثات میں ایک بچے سمیت 4 افراد جاں بحق جبکہ 7 زخمی ہوگئے۔ ریسکیو ذرائع کے مطابق کلفٹن تین تلوار پر رہائشی پلازہ کی تیسری منزل سے گر کر بچہ جاں بحق ہوگیا۔ 8 سالہ بچے کی شناخت "شان” کے نام سے ہوئی ہے۔ بلدیہ گلشن غازی میں گھر کی چھت گر گئی جس کے نتیجے میں ایک شخص جاں بحق ہوگیا ادھر اورنگی ٹاؤن 13 نمبر پر چھت گرنے سے دو خواتین زخمی ہوگئیں۔ گلشن اقبال کے بڑے شاپنگ مال کا سائن بورڈ گرنے سے ایک شخص زخمی ہوگیا جبکہ گلشن معمار میں آندھی کے باعث درخت گر گئے۔
کراچی کے مختلف علاقوں میں بارش کے بعد ٹریفک جام ہوگیا۔ میٹروپول اور ارد گرد کی سڑکوں پر ٹریفک جام ہونے کے باعث گاڑیوں کی قطاریں لگ گئیں۔ آندھی کے باعث کے الیکٹرک کی مختلف علاقوں میں تاریں ٹوٹ گئیں۔ اورنگی ٹاؤن میں پی ایم ٹی پول سمیت ٹوٹ کر گر گیا۔ سڑک پر بجلی کی تاریں اور پی ایم ٹی گرنے سے شہریوں میں خوف و ہراس پھیل گیا۔
شہریوں کا کہنا ہے کہ شکایت درج کرانے کے باوجود عملہ تاحال نہ پہنچ سکا جبکہ شہر کے دیگر علاقوں میں بھی درجنوں بجلی کی تاریں ٹوٹنے کی شکایات موصول ہوئیں۔
کراچی کے بارش کے بعد شہر کا بیشتر حصہ بجلی سے محروم ہوگیا اور کے الیکٹرک کے 925 سے زائد فیڈرز ٹرپ کرگئے، نارتھ ناظم آباد، ناظم آباد، نیو کراچی، ایف بی ایریا میں بجلی کی فراہمی معطل ہوگئی۔ گلشن اقبال، اسکیم 33، سرجانی ٹاؤن، اورنگی، کورنگی، لانڈھی، ملیر، شاہ فیصل، ایئرپورٹ، گڈاپ، اولڈ سٹی ایریا، سائٹ ایریا میں بھی بجلی کی فراہمی معطل ہوگئی۔
محکمہ موسمیات کا کہنا ہے کہ ” کراچی میں تیز ہوا کے جھکڑ چل رہے ہیں یہ سائیکلون نہیں ہے، سمندری سائیکلون پاکستانی حدود سے گزر چکا ہے جبکہ کراچی میں گرد آلود ہوائیں کچھ دیر کے لیے ہیں۔”
