کویت اردو نیوز 07 فروری: کویت میں کورونا وباء سے بچاؤ کے لئے پاکستان سے 3 ہزار سے زائد ڈاکٹر، نرسیں اور طبی افراد کو کویت بھیجا گیا ہے: مشیر برائے اوورسیز پاکستانیز ایوب آفریدی
تفصیلات کے مطابق مشیر برائے اوورسیز پاکستانیز ایوب آفریدی نے کہا کہ ” خلیجی ملک کویت میں کورونا کے دوران پاکستان سے وباء کے دوران ساڑھے 3 ہزار سے زائد ڈاکٹروں ، نرسوں اور دیگر طبی تکنیکی افراد کو کویت بھیجا گیا جبکہ مزید 3 ہزار ڈاکٹرز اور طبی عملے کو بھی بھیجا جائے گا۔
اُردو پوائنٹ کے مطابق وزیراعظم عمران خان کے مشیر برائے سمندر پار پاکستانیز ایوب آفریدی کے دفتر سے جاری کردہ ایک بیان میں بتایا گیا ہے کہ ابتدائی طور پر جولائی 2020ء میں 600 پاکستانی طبی ماہرین کو بھیجنے کے لیے پاکستان اور کویت کے درمیان ایک معاہدہ طے پایا جس کے بعد پاکستان سے وباء کے دوران ساڑھے 3 ہزار سے زائد ڈاکٹروں ، نرسوں اور دیگر طبی تکنیکی افراد کو کویت بھیجا گیا اور مزید 3 ہزار ڈاکٹرز اور طبی عملے کو ابھی بھیجا جائے گا جبکہ سعودی عرب کی جانب سے بھی طبی عملے کے لیے سینکڑوں پاکستانیوں کی بھرتیاں کی جارہی ہیں۔
یاد رہے کہ سکیورٹی وجوہات کی بناء پر کویت نے سال 2011ء میں ایران ، عراق ، شام اور افغانستان کے ساتھ پاکستانی شہریوں کے لیے ویزوں کا عمل معطل کردیا تھا تاہم پاکستان نے 2020ء میں ویزوں کی بحالی کے لیے کویت کے ساتھ بات شروع کی جس کے نتیجے میں کویت نے 2021ء کے وسط میں پاکستانی شہریوں کے لیے کاروباری اور فیملی ویزوں کا اجرا دوبارہ شروع کیا تو نرسوں ، ڈاکٹروں اور طبی تکنیکی عملے کا پہلا گروپ کویت بھیجا گیا صرف یہی نہیں بلکہ اس کے بعد مزید طبی عملہ بھی خلیجی ملک روانہ کیا گیا۔
علاوہ ازیں کویت نے 2 سال بعد وزٹ ویزا کا آن لائن اجراء دوبارہ شروع کردیا ہے۔ کویت کی جانب سے کورونا وباء کے باعث روکے گئے وزٹ ویزا جاری کرنے کے آن لائن عمل کا آغاز 2 سال کے وقفے کے بعد ایک بار پھر کردیا گیا ہے۔ وزارت داخلہ نے تقریباً دو سال کے وقفے کے بعد آن لائن ویب سائٹ کے ذریعے سیاحتی ویزوں کی فراہمی دوبارہ شروع کردی ہے۔ یہ ویزا 53 ممالک کے شہریوں کے لیے اب آن لائن دستیاب ہے اور ملک میں آنے سے پہلے اسے حاصل کرنا ضروری ہے۔