کویت اردو نیوز 17جون:موبائل فونز کا استعمال آج کل ناگزیر ہو چکا ہے۔ایک دوسرے سے بات چیت اور کام کے دوران موبائل فون کا استعمال لازمی ہوگیا ہےیہ ایک ایسی ایجاد ہے جس نے ہماری زندگیوں اور رات دن کے معمول کو اپناغلام بنا لیا ہے۔ جس کے بغیر ہم شاید اب ادھورے ہیں۔ یہاں تک کہ ریڈیو، ٹی وی ، کیمرہ غرض ہر چیز اس چھوٹے سے آلے میں سمو کر رہ گئ ہے۔
مہنگے موبائل فون اب اسٹیٹس سمبل بن چکے ہیں۔ موبائل فون پر رقم کی بربادی ایک عام بات ہے۔ نئے اور مہنگے موبائل فون خریدنا اور استعمال کرنا فیشن کا نیا رجحان ہے۔ ہر دوسرا شخص نیا اور مہنگا موبائل فون خریدنا چاہتا ہے۔ یہاں تک کہ تحقیق سے پتہ چلا ہے کہ لوگ آئی فون کا نیا ماڈل خریدنے کے لئے اپنے گردے بیچ دیتے ہیں۔ لوگوں کو نئے اور مہنگے موبائل فون استعمال کرنے کی عادت پڑ گئی ہے۔
انٹرنیشنل آرگنائزیشن فارریسرچ کی ایک تحقیق کے مطابق موبائل فون سے نکلنے والی شعاعیں دماغ پر منفی اثرات ڈالتی ہیں اور دماغ کی کارکردگی پر اثر انداز ہوتی ہیں۔
حالیہ تحقیق کے مطابق وائرلیس آلات سے خارج ہونے والی تابکاری شعاعیں مختلف طبی مسائل جن میں کینسر سے لے کر الزائمر اور رعشہ جیسے امراض شامل ہیں ، کاباعث بن سکتی ہیں۔ سائنسدانوں کے مطابق یہ شعاعیں جسم میں تنائو کا باعث بھی بنتی ہیں۔ خاص طور پر نوجوان لڑکوں اور لڑکیوں میں موبائل فون کابہت زیادہ یا ضرورت سے زیادہ استعمال نیند کی کمی اور مختلف اعصابی اور نفسیاتی مسائل کا سبب بن سکتا ہے۔
بین الاقوامی میڈیا رپورٹ کے مطابق ایک نئی تحقیق میں سائنسدانوں نے یہ حیران کن انکشاف کیا ہے کہ موبائل فون کا زیادہ استعمال لوگوں میں خطرناک بیماریوں کا سبب بن کر ان کی عمر میں کمی کر سکتا ہے۔سائنسدانوں نے بتایا ہے کہ اسکرین زیادہ دیر تک دیکھنے سے آنکھوں کو جو نقصان پہنچتا ہے وہ جسم کے دیگر اعضا پر بھی منفی اثرات مرتب کرتا ہے۔اس تحقیق میں سائنسدانوں نے مکھیوں پر تجربات کیے ہیں، اس دوران جن مکھیوں کو زیادہ روشنی میں رکھا گیا تھا ان کی عمر دیگر مکھیوں کی نسبت واضح طور پر کم ہو گئی تھی۔نتائج میں سائنسدانوں نے بتایا ہے کہ اسکرین سے آنکھوں کو پہنچنے والا نقصان دیگر اعضا کے ساتھ ساتھ مدافعتی نظام کو بھی کمزور کرتا ہے اور کئی حوالوں سے نقصان دہ ثابت ہوتاہے۔
اس میں ریڈیو فریکوئنسی توانائی موجود ہوتی ہے اور انسانی جسم کے جس حصے کے قریب موبائل فون ہوتا ہے، وہاں کے ٹشوز ریڈیوایکٹو توانائی اپنے اندر جذب کر لیتے ہیں جو انسانی صحت کو بے حد نقصان پہنچاتے ہیں۔ جبکہ موبائل فون کے زیادہ استعمال سے قوت مدافعت بھی کمزور ہونے لگتی ہے۔ ایک تحقیق کے مطابق موبائل فون کی اسکرین یا کی پیڈ کو مستقل چھونے اور استعمال کرنے سے اس میں مختلف جراثیم اور بیکٹیریا سٹور ہو جاتے ہیں اور ایک رپورٹ کے مطابق ایک موبائل فو ن پر ایک ٹوائلٹ سیٹ سے بھی زیادہ جراثیم پھیلانے والے بیکٹیریا اور جراثیم موجود ہوتے ہیں۔
