کویت اردو نیوز،27جون: اس سال حج سیزن میں اردو سمیت بیس زبانوں میں خطبہ حج کا ترجمہ نشر کیا جائے گا اور یہ عمل امور مسجد الحرام اور مسجد نبوی کے جنرل پریذیڈنسی میں زبان و ترجمے کا ادارہ انجام دے گا۔
ترجمہ نشر کرنے کا یہ کام جنرل پریذیڈنسی کی زبان و ترجمے کے ادارے کی طرف سے انجام دیے گئے دیگر اہم کاموں میں سے ایک ہوگا۔
ادارے کے نائب جنرل صدر احمد الحیمدی کا کہنا ہے کہ خطبہ حج کا ترجمہ ادارے کے 2024 کے اسرٹیٹجک پلان کے عین مطابق ہے۔
ادارہ خدمات کی فراہمی میں توسیع کے بعد 20 بین الاقوامی زبانوں اردو، انگریزی، فرانسیسی، فارسی، ہاؤسا، روسی، ترکی، پنجابی، چینی، مالائی، سواحلی، ہسپانوی، پرتگالی، امہاری، جرمن، سویڈش، اطالوی، ملیالم، بوسنیائی اور فلپائنی زبانوں میں خطبہ حج کا ترجمہ نشر کیا جائے گا۔
میڈیا کے مطابق منارہ الحرمین ڈیجیٹل پلیٹ فارم، قرآن وسنت چینلز اور 10 ایف ایم ریڈیو خطبہ حج کا ترجمہ نشر کریں گے۔
خطبہ حج کا ترجمہ نشر کرنے کے لیے منارات الحرمین پلیٹ فارم سے ڈیجیٹل سروسز سسٹم کی تیاری کا اعلان کیا گیا ہے۔
جنرل پریذیڈنسی انڈر سیکرٹری جنرل برائے تکنیکی امور ڈیجیٹل ٹرانسفارمیشن اور مصنوعی ذہانت انجینیر وسام بن محمد مقادمی نے کہا ہے کہ خطبہ کے ترجمے کے منصوبے کا مقصد مسلمانوں کو ڈیجیٹل دنیا کو استعمال کرتے ہوئے خطبہ حج سننے اور دیکھنے کے قابل بنانا ہے۔
یہ سروس مسجد حرام کے منارات حرمین پلیٹ فارم کی ویب سائٹ اور اسمارٹ فون ایپلی کیشنز کے ذریعے دنیا بھر میں 500 ملین سے زیادہ افراد تک پہنچانے کے لیے تیار کی گئی ہے
