کویت اردو نیوز ، 13 اکتوبر 2023: چینی دارالحکومت میں ایک حملہ آور نے اسرائیلی سفارت خانے کے ملازم پر تیز دھار چاقو سے وار کیا اور فرار ہوگیا۔
عالمی خبر رساں ادارے کے مطابق سوشل میڈیا پر وائرل ہونے والی ویڈیو میں دیکھا جا سکتا ہے کہ ایک شخص چاقو تھامے دوسرے شخص کو زمین پر گھونپ رہا ہے۔
چاقو کے حملے کا شکار ہونے والے کا خون بہہ رہا ہے اور زمین پر بے حرکت پڑا ہے۔ حملہ آور اسے مردہ سمجھ کر جائے وقوعہ سے فرار ہو جاتا ہے، جو خود بھی معمولی زخمی ہو گیا تھا۔
بعد ازاں اسرائیلی وزارت خارجہ نے تصدیق کی کہ بیجنگ میں اس کے ایک ملازم پر چاقو سے حملہ کیا گیا تاہم وہ زخمی ہوگیا اور اس کا اسپتال میں علاج جاری ہے۔
اسرائیلی وزارت خارجہ کے بیان میں مزید کہا گیا ہے کہ زخمی اہلکار کی حالت اب خطرے سے باہر ہے۔ پولیس حملہ آور کی گرفتاری اور واقعے کے پیچھے محرکات جاننے کے لیے تفتیش کر رہی ہے۔
اسرائیلی وزارت خارجہ کے مطابق اہلکار پر بیجنگ میں سفارت خانے سے ایک کلومیٹر دور ایک اور مقام پر حملہ کیا گیا تاہم زخمی اہلکار کی شناخت ظاہر نہیں کی گئی۔
واضح رہے کہ یہ حملہ اس وقت ہوا ہےجب اسرائیل کی بمباری میں 1500 سے زائد فلسطینی شہید اور 6 ہزار سے زائد زخمی ہوئے ہیں ۔
