کویت اردو نیوز ، 19 اکتوبر 2023 : اسرائیل کی بربریت عروج پر ہے، سفارتی سطح پر کوششیں بھی اسرائیل کو فلسطینیوں کے خون سے ہاتھ رنگنے سے نہیں روک سکیں، اسرائیلی فورسز نے غزہ کے مزید اسپتالوں پر حملے شروع کر دیے ہیں۔ القدس، الشفاء ہسپتال اور ہلال احمر کے ہیڈ کوارٹر کے قریبی علاقوں پر آدھے گھنٹے تک بمباری کی گئی جس کے نتیجے میں چوبیس گھنٹوں میں چھ سو چوراسی فلسطینی شہید ہو چکے ہیں۔
اسرائیلی بمباری سے غزہ میں طبی ڈھانچے کو ناقابل تلافی نقصان پہنچا ہے، محصور پٹی میں ادویات اور دیگر طبی سامان کی شدید قلت ہے اور ڈاکٹر زخموں کے علاج کے لیے سرکہ کا سہارا لے رہے ہیں۔
غزہ کے اسپتالوں کی ابتر صورتحال پر نرسیں بھی رو پڑیں، اور کہا کہ طبی عملہ اور ڈاکٹرز بے بس ہیں، اسپتال میں دوا نہیں، بیڈ نہیں، زخمیوں کے علاج کی جگہ نہیں، ایسی صورتحال پہلے کبھی نہیں دیکھی گئی۔
اسرائیلی فوج نے پناہ گزین کیمپ میں دو گھروں پر بمباری کرکے مزید 40 فلسطینیوں کو شہید کردیا۔ دیر البلاح میں ایک مکان کو نشانہ بنا کر دس فلسطینی شہید ہوئے جب کہ متعدد ملبے تلے دب گئے۔
الزیتون کے علاقے میں مکانات پر 20 بم گرائے گئے جس سے رہائشیوں کے سروں پر چھتیں گر گئیں۔
نصیرات کے علاقے میں مسجد پر بمباری سے خواتین اور بچوں سمیت درجنوں افراد شہید ہوگئے، بندرگاہ کے قریب 12 فلسطینیوں کو نشانہ بنایا گیا۔
راکٹ اور میزائل حملوں سے خان یونس میں اقوام متحدہ کے اسکول کو بھی نقصان پہنچا۔
