گاڑی کی نمبر پلیٹ گم ہو جائے تو کیا کریں؟

کویت اردو نیوز: سعودی محکمہ ٹریفک نے گاڑی کی نمبر پلیٹ غائب ہونے کی صورت میں ضروری کارروائی کا طریقہ کار جاری کر دیا ہے۔

محکمہ ٹریفک نے ایکس اکاؤنٹ پر کہا ہے کہ اگر کسی کی گاڑی کی نمبر پلیٹ گم ہو جائے تو وہ اپنے ابشر اکاؤنٹ کے ذریعے گمشدگی کی رپورٹ درج کرا سکتا ہے۔

محکمہ ٹریفک کے مطابق اگر دو گاڑیوں کا مالک ایک گاڑی کی نمبر پلیٹ دوسری گاڑی میں استعمال کرتا ہے تو ایسی صورت میں اسے فحص دوری (گاڑیوں کاسالانہ انسپیکشن)، انشورنس و فیس کی ادائیگی کےبعد محکمہ ٹریفک کےماتحت وہیکل رجسٹریشن کارڈجاری کرنیوالے قریب ترین ادارےسےرجوع کرناہوگا۔

واضح رہے کہ محکمہ ٹریفک نے مذکورہ وضاحت اس حوالے سے ایک صارف کے سوال کے جواب میں جاری کی ہے۔

اس سے قبل ٹریفک پولیس نے ٹرالر یا ٹرک کو اوور ٹیک کرنے کے طریقے کےحوالے سے وارننگ جاری کی تھی ۔

ٹریفک پولیس نے شاہراہوں پر چھوٹی گاڑیوں کے ڈرائیورز کو یہ ہدایت جاری کی ہے کہ وہ ٹرالر یا کسی ڑی گاڑیوں کو اوور ٹیک کرتے ہوئے احتیاطی تدابیر پر سختی کےساتھ عمل کریں۔

ٹریفک اتھارٹی کے ٹوئٹر پر جاری احتیاطی تدابیر کے حوالے سے کہا گیا ہے کہ ٹریفک قوانین کا مقصد لوگوں کے جان و مال کا تحفظ ہے۔

ہائی ویز یا شہر میں بڑے ٹرکوں اور ٹریلرز سمیت ہیوی ڈیوٹی گاڑیوں کو اوور ٹیک کرتے وقت 4 احتیاطی تدابیر اختیار کی جائیں تاکہ کسی مشکل صورتحال کا سامنا نہ کرنا پڑے۔

ٹریفک پولیس کی جانب سے انفوگرافک میں ان معاملات کی وضاحت کرتے ہوئے کہا گیا ہے کہ چھوٹی گاڑی کا ڈرائیور جب بھی ہیوی ڈیوٹی گاڑی کے پاس سے گزرے تو گاڑی اور ٹرالر کے درمیان مناسب فاصلہ یقینی بنائے۔

ہائی وے ٹرک یا ٹرالر کو اوور ٹیک کرتے وقت اس بات کو یقینی بنائیں کہ کوئی گاڑی پیچھے نہ آ رہی ہو۔

سنگل ٹریک روڈ ہونے کی صورت میں ٹرک کو اوور ٹیک کرنے سے پہلے سامنے سے آنے والی گاڑی سے ہوشیار رہیں، جب تک سامنے سے آنے والی گاڑی گزر نہ جائے تب تک اوور ٹیک نہ کریں۔

ٹرک یا بھاری گاڑی کو اوور ٹیک کرنے سے پہلے سگنل دیں تاکہ ٹرک ڈرائیور ہوشیار رہے۔ اوور ٹیک کرتے وقت بڑی گاڑی (سائیڈ) کے درمیان زیادہ فاصلہ رکھیں۔

ٹرک کو کراس کرنے کے بعد فوراً اپنی گاڑی کو اس کے سامنے نہ لائیں بلکہ کچھ دور جانے کے بعد گاڑی کو اپنے ٹریک پر لے آئیں۔

واضح رہے کہ ٹریفک پولیس کی جانب سے وقتاً فوقتاً لوگوں کو احتیاطی تدابیر کے بارے میں آگاہ کیا جاتا ہے، جس کا مقصد حادثات کو روکنا اور لوگوں کی جان و مال کو تحفظ فراہم کرنا ہے۔